Japaun Kontinua Apoiu Setór Privadu Timor-Leste

Antigu Embaixadór Japaun mai Timor-Leste, Iwao Kitahara.

Díli, 17 Setembru 2026 (RAFA) – Antigu Embaixadór Japaun mai Timor-Leste, Iwao Kitahara, reafirma Japaun kontinua apoiu  setór privadu sira iha Timor-Leste liuhusi hametin relasaun amizade no kooperasaun bilateral entre nasaun rua.

Antigu Embaixadór Iwao Kitahara hato’o asuntu ne’e bainhhira hasoru malu ho Primeiru-Ministru Kay Rala Xanana Gusmão iha Palásiu Governu, Díli, Kinta-ne’e.

Iwao Kitahara hatete nia mai hasoru Xefi Ezekutivu Timor-Leste nian hodi diskute no dezenvolve liután relasaun amizade no kooperasaun entre Timor-Leste no Japaun.

Enkontru ne’e mós aborda prosesu dezenvolvimentu Timor-Leste ne’ebé kontinua la’o, inklui nesesidade atu haforsa apoiu no kooperasaun ho parseiru dezenvolvimentu sira iha área oioin,.

Iwao Kitahara sente kontente tebes mai iha Timor-Leste diskute no dezenvolve liután relasaun amizade Timor-Leste ho Japaun ba futuru.

Iha kooperasaun bilateral ne’e, Japaun konsidera importante atu fasilita ligasaun entre Timor-Leste nia setór privadu no organizasaun sira seluk, hodi kontribui ba dezenvolvimentu ekonomia no indústria nasional.

Área sira ne’ebé bele sai prioridade iha kooperasaun inklui turizmu, peskas no agrikultura, inklui promosaun kafé Timor-Leste nian ba merkadu li’ur, no setór estratéjiku seluk.

Relasaun Timor-Leste no Japaun durante ne’e bazeia ba amizade no kooperasaun iha área dezenvolvimentu, ho fó énfaze ba esforsu hamutuk atu apoiu dezenvolvimentu sustentável no oportunidade ekonomia ba Timor-Leste.

Jornalista: Cesarina de Carvalho