PM Xanana Hameno Ba Xefe Estadu Ko’alia Paz no Diálogu Mundiál iha Assembleia Jerál ONU

PM Xanana Gusmão hameno ba Xefe Estadu atu ko'alia paz no diálogu mundiál iha Assembleia Jerál ONU.

Díli, 17 Setembru 2026 (RAFA)- Primeiru-Ministru, Kay Rala Xanana Gusmão, hameno Xefe Estadu atu aprezenta pozisaun Timor-Leste kona-bá situasaun mundiál iha Asembleia Jerál ONU nian.

Pozisaun Timor-Leste nian mak rekomenda ba nasaun hotu-hotu atu promove paz no diálogu ba rezolve konflitu internasionál ne’ebé kontinua lori impaktu negativu ba sosiedade internasionál.

Prezidente Repúblika José Ramos-Horta, Sesta aban, 18 Setembru 2026, sei halo viajen ba Nova Iorke, hodi partisipa iha sesaun Assembleia Jerál ONU nian ba dala-81.

“Prezidente Repúblika sei ba Nova Iorke reprezenta  Timor-Leste hodi ko’alia iha Asembleia Jerál ONu nian,  nune’e Xefe Estadu sei ko’alia kona-bá situasaun mundu nian. Agora ulun fatuk moras tebe-tebes, mais pasiensia ita tenke aguenta ida ne’e. Prezidente Repúblika sei ba fó hatene mós saida mak ita hala’o hela no Timor nia hanoin kona-baásituasaun iha mundu ne’e,” Primeiru-Ministru, Kay Rala Xanana Gusmão inform aba jornalista sira hafoin enkontru semanál ho Prezidente Repúblika, José Ramos-Horta iha Pálasiu Prezidensiál, Kinta-ne’e.

Xefe Governu hatutan,  iha ONU ne’e la’ós ba gava aan, maibé Prezidente Repúblika sei ba husu dehan tenke iha paz, tenke iha dialógu atu garante estabilidade internasionál ne´ebé lori paz mundiál.

Xanana  arumenta katak tanba funu mak folin kumbustivel ne´e kontinua aumenta, tanba ne´e Xefe Estadu ba Nova Iorke ne’e atu espresa mós hanoin hodi husu atu hotu-hotu moris iha dame hodi estabiliza presu kombustivel ne´ebé afeta maka’ás ba mundu.

Primeriu-Ministru, Xanana Gusmão mós informa ba Prezidente Repúblika, José Ramos-Horta katak iha fulan-Outubru sei halo vizita ofisiál ba Tailándia no patisipa workshop kona-bá fundu petroleu.

“Ha’u mós informa ba Prezidente Repúblika katak, fulan-Outubru, ha’u sai ba Tailándia  partisipa workshop kona-bá fundu petroleu no mós vizita ofisiál ba Tailándia,” Xanana hateten.

Jornalista: Cristina Ximenes