Fornesimentu Alkatraun no Folin Simentu Sa’e Sai Obstákulu Ba Obra Estrada

Ministru Obra Públiku (MOP), Samuel Marçal.

Díli, 16 Setembru 2026 (RAFA) – Ministru Obra Públiku (MOP), Samuel Marçal, afirma katak difikuldade iha fornesimentu alkatraun no aumentu folin simente sai obstákulu ba prosesu konstrusaun no finalizasaun obra estrada, liuliu estrada urbana sira iha Díli no munisípiu sira seluk.

Ministru Samuel Marçal hateten, planu estrada urbana sira ne’ebé Governu lansa ona kuaze bele finaliza, maibé problema iha fornesimentu alkatraun, inklui stock ne’ebé limitadu no folin ne’ebé sa’e, halo kompañia konstrusaun sira presiza ajusta tempu ba kontinuidade obra.

Governante ne’e esplika  kona-bá situasaun ne’e iha ligasaun ho konflitu iha Médiu Oriente, tanba alkatraun barak mai husi rejiaun ne’ebá.

“Estrada sira, liuliu estrada urbana iha Díli laran, tuir loloos bele hotu ona. Maibé, tanba alkatraun ne’ebé ita hotu akompaña, iha difikuldade oituan atu hetan Ministru Samuel Marçal hateten ba jornalista sira iha Palásiu Governu, Kuarta-ne’e.

Nia hatutan, dadaun mós simentu laiha, foin tama fali. Alkatraun mós sei susar atu hetan. Sira iha estoke oituan, maibé sira uza hela. La’ós de’it susar. Mais, folin mós karun Obras Publika nafatin haka’as kompañia sira atu aselera mós susar oituan. Tanba, problema sira-ne’e hotu, ne’e impaktu husi funu iha média oriental ne’ebá.

Aleinde ne’e Governu kontinua halo esforsu atu enkoraja kompañia konstrusaun sira aselera obra estrada sira, maibé difikuldade iha matéria-prima no aumentu folin sai dezafiu ba prosesu ne’e.

Ministru Samuel Marçal espera katak molok mandatu Governu remata, situasaun iha Médiu Oriente bele normaliza, nune’e bele fasilita fornesimentu alkatraun no permite kompanhia sira aselera implementasaun obra.

“Ita bele aselera lalais, tanba sira bele fasilita alkatraun. Loos duni, iha impaktu. Kuandu obra sira ne’ebé kuaze atu finaliza, kompañia barak sei dada iis oituan, liuliu sira ne’ebé asina kontratu tinan ida ka rua ba kotuk,” haktuir Ministru Obra Públiku ne’e.

Aleinde problema fornesimentu matéria-prima, Ministru Samuel Marçal relata katak Governu iha planu atu kompleta prosesu kontratasaun no lansa projetu estrada sira hotu iha tinan 2026, nune’e implementasaun bele kontinua iha tinan 2027 no 2028.

Nia hateten katak planu ne’e parte husi planeamentu ba períodu tinan lima, ho objetivu atu garante katak projetu sira bele konklui antes Governu foun asume iha tinan 2029.

“Ida-ne’e mak ita esforsu atu antes tinan ida-ne’e remata, ita asina no lansa hotu kedas ba estrada nasionál no munisipál. Kuaze 2,000 quilómetru mak tenke konklui ba tinan lima nia laran,” Ministru afirma.

Nia haktuir katak to’o agora, iha ona estrada lubuk ida ne’ebé konklui, inklui projetu sira iha Ataúru, Remexio, Dili, Balibó, Batugade, Baguia, Viqueque no fatin sira seluk.

Jornalista: Cesarina de Carvalho