FONGTIL Kestiona Aumentu Presu Simentu no Deskonfia Kompaña Sira Halo Manipulasaun

Simentu ho kuantidade labarak iha hela armazen kompañia balun nian, maibé la fa'an tanba ema sosa tiha ona.

Díli, 16 Setembru 2026 (RAFA)- Forum Organizasaun Noun Governamentál Timor-Leste (FONGTIL) kestiona  aumentu presu  ba simentu no  deskonfia empreza distrbuidór sira tenta atu halo manipulasaun folin iha merkadu rai-laran.

Diretór Ezekutivu FONGTIL, Inocêncio de Jesus Xavier, bá  RAFA iha Díli, Kuarta-ne’e, hatete sira-nia parte kestiona aumentu presu sasán iha merkadu, liuliu presu simentu ne’ebé sa’e husi presu antes US$4,50 sentavu ka $4,75 sentavu ba US$6,00 to’o US$6,50 sentavu kada saka.

“Ha’u haré ne’e polítika kompaña nian, ne’e  manipulasaun sasán hodi hasa’e presu,  ha’u iha esperiénsia antes sosa simentu tonasa  US$195.00 kadu Jumbo, la kleur ha’u bá fali dehan simente laiha ona liu loron tolu ka haat dehan semente iha ona, maibé folin US$200-resin kada jumbo,” Inocêncio de Jesus Xavier hateten.

Diretór Ezekutivu FONGTIL husu Governu atu halo kontrolu rigorozu ba atividade komersiál  husi kompañia sira ne’e. Tanba kompañia balun  halo finje kona-bá falta simentu hodi justifika aumentu presu, liuliu iha situasaun ne’ebé Lei Impostu Valór Akreditasaun (IVA) implementa ne´e.

“Ha’u husu Ministru Komérsiu industria ho Polísia atu  servisu urjentemente atu halo ida-ne’e, ita labele halimar ho povu. Ró sira ne’ebé tama mai  iha Tibar ne’e tula saída, ne’e maka tanbasá derepente semente laiha,  ka sira maka  halo finje  hodi  hasae simentu nia presu,” nia tenik.

Fó  hanoin fali katak, daudaun ne’e Timor-Leste enfrenta hela krize fornesimentu simentu iha merkadu nasionál. Ho situasaun ne’e, loja sira ne’ebé sira-nia estoke simentu sei iha hela komesa hasa’e ona folin husi US$4,50 sentavu ba US$5.00  to’o US$6.00 kada saku, no balun sa’e ona ba US$6,50 sentavu kada saku.

Jornalista: Marcelino Tomae