Ajénsia ONU Sira Kontribui no Hatudu Dezempeñu Di´ak Ba Dezenvolvimentu Timor-Leste

Prezidente Repúblika José Ramos-Horta halo enkontru ho Kordenadora Nasoins Unidas (ONU) iha Timor-Leste, Funmi Balogun, Kuarta 16 Setembru 2026.

Díli, 16 Setembru 2026 (RAFA)- Ajénsia ONU sira kontribui no hatudu dezempeñu di´ak ba dezenvolvimentu nasionál iha Timor-Leste tuir nesesidade ne´ebé Estadu no povu presiza.

Kordenadora Nasoins Unidas (ONU) iha Timor-Leste, Funmi Balogun, Kuarta-ne’e, hateten, papél ONU nian mak hanesan parseiru ba Governu Timor-Leste, liu husi apoiu iha área oi-oin, ho objetivu atu ajuda país atinji nia objetivu dezenvolvimentu.

“Avaliasaun ne’e di’ak. Sempre di’ak. Ami, hanesan parseiru ida, ami fó apoiu ba Governu Timor-Leste no povu Timor-Leste atu atinji sira-nia objetivu dezenvolvimentu,” hateten Kordenadora ONU iha Timor-Leste, Funmi Balogun ba jornalista sira hafoin hasoru malu ho PR José Ramos-Horta iha Palásiu Prezidensiál, Kuarta-ne’e.

Reprezentante ONU ne´e esplika, ONU la’ós substitutu ba Governu. Tanba ne’e, ONU fó apoiu no asisténsia téknika. ONU mós fó apoiu finanseiru balun, maibé responsabilidade prinsipál nafatin iha Governu Timor-Leste.

“ONU nia servisu mak atu apoia de’it iha área oi-oin no área ki’ik sira ne’ebé ONU bele ajuda. Maibé governu halo esforsu tomak atu asegura katak povu Timor-Leste bele atinji metas ne´ebé iha,” nia fomenta.

Kordenadora ONU Funmi Balogun subliña iha objetivu dezenvolvimentu sustentável (ODS) sira, ONU nia papél mak atu apoia esforsu ne’e, atu asegura katak objetivu hirak ne’e bele realiza no Governu mak iha Kbi´it rasik no knar tomak atu lao tuir hodi lori povu ba moris di´ak no dignu.

Jornalista: Cristina Ximenes