FONGTIL Organiza Workshop Nasionál Ba Promosaun Direitu Umanu no Advokásia Konjunta

FONGTIL Organiza Workshop Nasionál Ba Promosaun Direitu Umanu no Advokásia Konjunta, Kuarta 16 Setembru 2026.

Díli 16 Setembru 2026 (RAFA)- Organizasaun Naun Governamentál Timor-Leste (FONGTIL), Kuarta-ne´e, organiza workshop nasionál ne´ebé dedikadu ba Sensibilizasaum ASEAN kona-bá promosaun direitu umanu, promove advokasia konjunta no dezenvolvimentu ba organizasaun sosiedade sivíl iha Timor-Leste.

Iha Workshop Nasionál ne’e envolve fasilitadór sira mai husi Malázia no Singapura, ho objetivu atu aumenta koñesimentu no sensibilizasaun organizasaun sosiedade sivíl iha Timor-Leste kona-bá promosaun direitu umanu, advokasia konjunta no dezenvolvimentu organizasaun.

Diretór Ezekutivu FONGTIL, Inocencio de Jesus Xavier, iha diskursu hatete, workshop nasionál ne’e ho objetivu atu aumenta koñesimentu no komprensaun, husi organizasaun sosiedade Sivíl, komunidade no parte relevante sira, inklui akademiku sira ba asuntu direitu umanu no ASEAN.

Nia fundamenta, iha workshop nasionál ne’e organizasaun hotu-hotu atu hateke tuir matan dalan ASEAN nian  hodi guia  iha pilar lima ne’ebé  importante liu kona-bá  komunikasaun polítika seguransa, ekonómika komunidade, sisosiu kulturál,  komunidade konetividade, no komunidade  haforsa   Institusaun sira, nu’udar navegasaun bá ASEAN

“Workshop ne’e  atu mantein kolaborasaun  entre organizasaun sosiedade sivíl,  liu-husi servisu advokasia konjunta,  partilla esperiénsia  no dezenvolve kapasidade organizasaun,” hatete Inocencio de Jesus Xavier.

Diretór ezekutivu ne´e hatutan, Kooperasaun ne’e importante tebes atu garantia katak direitu  umanu hetan respeia,  promove no proteje,  iha nivél Nasionál no komunidade ASEAN. No atu promove koñesimentu no kapasidade, organizasaun  sosiedade sivíl nian,  atu hametin advokasia Konjunta, no  promosaun direitu umanu, iha Timor-Leste,  no pilar lima ASEAN nian, iha servisu  advokasia  nivél sosiedade sivíl iha nivél rejionál no internasionál.

“Hametin koñesimentu bá  partisipante sira kona-bá  kona-bá  projetu no padarun direitu umanu  ASEAN nian liga ho istória Ezisténsia ASEAN, no ita hanensan  membru pleniu bá ASEAN iha tinan kotuk, para alende ida-ne’e  ita buka atu intende di’ak liután feramentu sira ka pontu legál serka  sira ne’ebé  adaptasaun Timor-Leste nian bá modalidade ASEAN,” tenik nia.

Iha fatin hanesan Diretór Ezekutivu Gabinete Apoiu Sosiedade Sivíl (GASC), Joaquim da Costa Pereira, hatete  GASC  parseiru ho FONGTIL iha apoiu ba organizasaun sosiedade sivíl iha Timor-Leste, inklui apoiu ba atividade sira ne’ebé relasiona ho ASEAN no CPLP. No FONGTIL sai parseiru iha IX Governu Konstitusionál, liuhusi apoiu finanseiru ba organizasaun sosiedade sivíl iha país ne’e.

“FONGTIL hanesan parseiru iha IX Governu Konstitusionál nian, ne’ebé ami apoia finanseiru ba organizasaun sosiedade sivíl iha país ida-ne’e. Ami mós parseiru ho FONGTIL hodi reativa Forum Sosiedade Sivíl CPLP no finansia mós eventu sira ne’ebé ASEAN organiza,” hatete Joaquim da Costa Pereira.

Diretór Ezekutivu GASC esplika, workshop ne’e konvida fasilitadór sira husi Malázia no Singapura, ne’ebé iha tempu badak sei akompaña movimentu sosiedade sivíl sira iha Forum ASEAN, inklui side conference sira ne’ebé konsidera hanesan movimentu importante iha estrutura ASEAN.

Nia dehan workshop ida-ne’e, fasilitadór sira fahe sira-nia esperiénsia ho organizasaun sosiedade sivíl iha Timor-Leste, hodi ajuda sosiedade sivíl sira atu sai ativu liután iha eventu sira ne’ebé ASEAN organiza.

Workshop ne’e mosu hanesan espasu ida atu fahe esperiénsia, hasa’e kapasidade no haforsa partisipasaun organizasaun sosiedade sivíl Timor-Leste iha forum rejionál, liuliu iha mekanismu sira ne’ebé relasiona ho ASEAN.

Jornalista: Marcelino Tomae