Ekipa Juri Rekrutamentu Kadete PNTL Identifika Kandidatu Balun La’ós Timor-oan

Prezidente ho membru juri rekrutamentu kadete PNTL.

Díli, 15 Setembru 2026 (RAFA)- Prezidente Juri ba Rekrutamentu Kadete Polísia Nasionál Timor-Leste (PNTL), Komisáriu Asistente Polísia José Soares, informa  ekipa juri halo re-verifikasaun dokumentu sira identifika kandidatu balun la’ós Timor-oan no kuaze dokumentu 1.000  la kompletu, inklui ema na’in-118 ne´ebé idade liu ona tinan 24.

“Ami re-verifikasaun dokumentu ne’e, ami fó ami nia laran hanesan mate restu ida hakarak buat loos. Ami halo tuir de’it Leí, ami la haré ba maubere oan, buibere oan ho ida ne’e polísia nia oan ne’e lae, Leí vale bá ema hotu la haré ba ain-tanan no la haré ba sapatu nabilan,  fuuk sui ka la sui,  Leí ba ema hotu hanesan,” Komisáriu Asistente Polísia José Soares hateten ba jornalista sira Segunda-ne’e.

Komisáriu Asistente ne´e afirma, artigu balun iha Lei mensiona katak dokumentu ne’ebé falsu bele prosesa tuir lei ne’ebé vigor, liu husi prosesu sivíl no prosesu kriminál. Tanba ne’e, hirak  ne’ebé mak dalaruma falsifika dokumentu ho sira seluk sira tenke responsabiliza tuir Leí ne’ebé vigor.

Prezidente juri rekrutamentu kadete PNTL ne’e garante, komisaun halo servisu ho laran no la halo diskriminasaun, hodi kaer ba prinsípiu meritu no transparansia.

Nia dehan, komisaun atuál nia knaar  atu haré de’it ba rekrutamentu. Se iha sala ruma ne’e órgaun seluk mak bele haré, no komisaun atual la fó sala ba komisaun anteriór. Nune’e mós, ba faze tuirmai sistema ezame sei bazeia ba komputadór eletroniku ne’ebé fornese husi Komisaun Funsaun Públika (KFP).

Nia hateten mekanismu rekturamentu ne’ebé  prevalese tuir lei  atu garante rezultadu ne’ebé mak loos, laiha intervensaun no evita erru umanu. Ne’ebé sira ezame hotu durante 20-30 minutu sai mai sira haré tiha kedas rezultadu, katak  laiha ema ruma atu envolve fó valor ba sira.

Komisáriu José Soares hatutan, Timor-Leste agora sai ona membru ASEAN. Tanba ne’e presiza promove polísia ne’ebé priense meritu, iha kapasidade no transparansia nune’e bele adopta an ho polísia sira iha rejiaun ida-ne’e.

Sei Públika iha Jornál da Repúblika 

Komisáriu Asistente Polísia José Soares anunsia katak totál kandidatu ne’ebé liu ona re-verifikasaun dokumentu hamutuk 12.877 no rezultadu sei públika iha Jornál da Repúblika.

“Husi Ministériu Interiór katak tenke públika ona kumpri ba orientasaun ida ne’e hahú husi aban, ita sei entrega rezultadu re-verifikasaun dokumentu bá iha Jornál da Republika, atu bele públika rezultadu re-verifikasaun dokumentu bá kandidatu ho totál 12.877,” Komisáriu Asistente Polísia José Soares informa.

Nia esplika, iha inisiu totál kandidatu 12.874, maibé ikus mai aumenta ba 12.877 tanba hetan tan dokumentu balun iha sekretariadu laran ne’ebé tau iha armariu no gaveta.

Prezidente Juri afirma, sekretariadu halo servisu ne’e kaer metin ba prinsípiu ne’ebé hakerek iha Diploma Ministeriál Númeru 35/2026.

Nia mós garante katak durante prosesu laiha individu ka instituisaun ida mak halo intervensaun, no Juri kompostu husi juri internasionál Guarda Nasionál Repúblicana (GNR) na’in-rua husi Portugál, Timor-Leste Police Development Program (TLPDP) na’in-rua, PNTL na’in-rua, inklui Komisaun Funsaun Públika (KFP).

Komisáriu Asistente José Soares hateten, hafoin públika iha Jornál da Repúblika, rezultadu mós sei fó sai iha munisípiu sira no iha sentru formasaun no  nia husu mós ba Provedoria Direitu Humanus no Justisa (PDHJ), Organizasaun Naun Govermental (NGO) no autoridade sira seluk atu akompaña prosesu re-teste ba kadete hodi asegura sekretariadu nia funsionamentu la’o ho di’ak.

Ikus liu Prezidente Juri ba Rekrutamentu Kadete PNTL ne’e promete sei servisu ho justisa no la haré ba influensia.

“Ha’u kompromete ba povu Timor laran tomak se ha’u sala hanesan komisaun ida uluk, ha’u entrega ha’u nia pistola bá komandante Lere para tiru mate tiha ha’u,” nia promete.

Nia hateten, nia hanesan mate restu desteradu tinan hitu no hetan ameasa oioin iha pasadu, maibé agora kompromete atu hala’o servisu ho loos. Nia garantia sei la haré ba polísia nia oan ka emboot nia oan.

Timor-oan hotu tenke tuir rekezitu ne’ebé estabelese iha Rezolusaun Governu númeru 15/2026, númeru 29/2026 no Diploma Ministeriál númeru 35/2026.

Jornalista: Juvinal Cabral dos Santos