PCIC ho SNI Detein Sidadaun Indonézia Ida ho Droga Tipu Sabu-Sabu no Extasi Grama 98-Resin

Evidénsia droga ne'ebé sidadaun Indonéziu ne'e lori tama mai Timor-Leste.

Díli, 12 Setembru 2026 (RAFA)—Polísia Sientífiku  Investigasaun Kriminál (PCIC) ho Servisu Nasionál Intelijénsia  (SNI) detén sidadaun Indonézia ida ne’ebé suspeita lori droga ho tipu  sabu-sabu  no extasi  tama Timor-Leste ho kuantidade grama 98,0162.

Informasaun husi fontes Servisu Sekreta haktuir katak sidadaun Indonézia ne’e tama mai Timor-Leste via terrestre uza transporte públiku iha loron 28 fulan-Agostu.

Autoridade Polísial Timor-Leste simu informasaun  husi Autoridade Indonézia katak sidadaun  ida ne’e tama ba Timor lori droga ho tipu oioin .

Hafoin simu tiha informasaun  ne’e PCIC hato’o   pedidu formál bá Minitériu Públiku  no submete  bá Tribunál hodi hasai mandatu detensaun.

Iha loron 29 fula-Agostu,  hale’u  tuku 12:00 meudia, PCIC   halo operasaun  hodi rekolla objetu  sira ne’ebé suspeitu lori no uza.

Iha operasaun ne’e, autoridade sira  halo apreensaun ba droga  ho tipu rua, mak sabu-sabu (Metamfetamina) ho pezu líkidu grama-93,9367  no Exstasi (MDMA) ho  grama 4,0795  ho totál droga ne’ebé fiksa hosi autoridade sira hamutuk grama-98,0162.

Informasaun ne’ebé iha tan katak droga sira ne’e,  sirkula iha merkadu, iha folin estimativa husi  US$250.00 to’o US$350.00 kada grama.

Ho estimasaun folin refere, totál droga ne’ebé  iha  bele iha valor merkadu entre US$24,504 no US$34,306, depende bá folin kada grama.

Iha teste bá droga ne’e rezultasu pozitivu, nune’e sei  submete bá Tribunál iha Segunda,  13 fulan-Setembru ne’e, hodi prosede   audénsia Julgamentu Prirmeiru Interogátoriu.

Jornalista: Marcelino Tomae