Ministra Saúde Élia Amaral Garante Rekrutamentu Profisionál Saúde La’o ho Transparénsia

Ministra Saúde, Élia A.A. dos Reis Amaral.

Díli, 11 Setembru 2026 (RAFA) – Ministra Saúde, Élia A.A dos Reis Amaral, garante prosesu rekrutamentu ba profisionál saúde  ba Ospitál Nasionál Guido Valadares (HNGV) sei hala’o ho justu tuir regra no  transparénsia.

Ministra Élia dos Reis Amaral informa katak komisaun rekrutamentu ida forma ona atu responsabiliza ba prosesu selesaun profisionál saúde sira ne’ebé sei konkore ba vaga hirak ne’e.

“Rekrutamentu sei justu no legál, tuir regra ne’ebé iha, atu nune’e, bele iha transparénsia. Ita garante ida-ne’e,” Ministra Élia dos Reis Amaral,  hateten hodi responde jornalista sira iha Palásiu Governu, Sesta-ne’e.

Governante ne’e haktuir rekrutamentu ne’e la’ós de’it ba HNGV, maibé sei prepara mós ba munisípiu sira, tanba Ministériu Saúde presiza hasa’e atendimentu iha fasilidade saúde sira iha Munisípiu, ne’ebé mós presiza rekursu umanu adisionál.

HNGV loke vaga hamutuk 478 ba profisionál saúde, ho períodu submisaun dokumentu hahú husi Segunda-Sesta, 7-18 Setembru 2026, durante oras servisu, iha Hospital António Carvalho Lahane.

Vaga 478 ne’e kompostu husi: Médiku Jeral Júnior A/1 – 112 vaga, Enfermeiru Jeral Júnior A/1 – 236 vaga, Enfermeiru Jeral Júnior B/1 – 14 vaga, Asistente Enfermeiru Jeral – 30 vaga, Parteira Jeral Júnior A/1 – 25 vaga, Parteira Jeral Júnior B/1 – 10 vaga.

Tékniku Radiolojia, TDTSP Jeral Júnior A/1 – 10 vaga, Tékniku Analista Laboratóriu, TDTSP Jeral Júnior A/1 – 4 vaga, Tékniku Analista Banku de Sangue, TDTSP Jeral Júnior A/1 – 3 vaga, Tékniku Fisioterapia, TDTSP Jeral Júnior A/1 – 2 vaga, Tékniku Biomediku, TDTSP Jeral Júnior A/1 – 3 vaga.

Tékniku Nutrisaun, TDTSP Júnior A/1 – 3 vaga, Tékniku Medical Record, TDTSP Júnior A/1 – 4 vaga,  Tékniku Farmásia, TDTSP Júnior A/1 5 vaga, Tékniku Radiolojia, TDTSP Jeral Júnior B/1 – 2 vaga.

Tékniku Fisioterapia, TDTSP Jeral Júnior B/1 – 2 vaga, Tékniku Biomediku, TDTSP Jeral Júnior B/1 – 2 vaga, Refkrasionista, TDTSP Jeral Júnior B/1 – 2 vaga, Tékniku Medical Record, TDTSP Jeral Júnior B/1 – 2 vaga, Tékniku Farmásia, TDTSP Jeral Júnior B/1 – 3 vaga no Asistente TDTSP – 2 vaga.

HNGV mós determina kór/mapa diferente ba kada área profisionál, inklui kór verde ba Médiku Jeral, azul ba Enfermajem, mean ba Parteira, kinor ba Tékniku Aliadu/TDTSP, laranja ba Asistente Enfermajem no chocolate ba Asistente TDTSP.

Iha parte seluk, Diretór Servisu Apoiu Diagnóstiku no Terapeutiku HNGV, Vidal de Jesus Lopes relata kona-ba rekrutamentu ne’e  nia objetivu atu reforsa rekursu umanu no hadi’a kualidade servisu saúde ba komunidade.

Nia  hatutan HNGV iha ona orsamentu ba rekrutamentu funsionáriu iha tinan 2026, inklui médiku, parteira, enfermeiru, tékniku aliadu no asistente enfermajem.

“Rekrutamentu ba funsionáriu sira ne’e kompostu husi médiku, parteira, enfermeiru, tékniku aliadu no asistente enfermeiru, ba orsamentu ha’u sei la temi maibé enprinsipiu ami preve,” Diretór Vidal de Jesus Lopes subliña.

Nia mós haktuir prosesu rekrutamentu ne’e hala’o liuhosi koordenasaun administrativa entre HNGV, Ministériu Saúde no Komisaun Funsaun Públika.

Jornalista: Cesarina de Carvalho