Igreja Katólika Timor-Leste Agradese Ba Kolaborasaun Hotu Hodi Lori Hikas Preladus Katóliku Na’in-Haat Mai Halot iha Katedrál Díli

Serimonia funeral restus mortais preladus katóliku na'in-haat iha Igreja Parokia Katedral Imaculada da Conceicão, Díli, Kinta 10 Setembru 2026. Imajen/CET

Díli, 10 Setembru 2026 (RAFA)- Bispu Dioseze Maliana, Dom Norberto do Amaral, hatete restus mortais preladus na’in-haat fila mai Timor-Leste nu’udar domin ne’ebé laiha rohan ba rai no sarani sira, maski sira mai ho ruin no ahukedesan, tanba ne’e agradese ba Governu, povu no sarani sira tomak nia kolaborasaun ba prosesu transladasaun restus mortais preladus sira la’o di’ak to’o serimónia funebre.

“Ho doben maktoban preladus imi fila mai ho ruin no akudesan ne’ebé la iha lian maibé rai hela domin ne’ebé la iha rohan, husi rai rahun ne’ebé la iha folin hamoris ona liman rohan ne’ebé folin boot mai Timor-oan sira. Iha rai Tasi-Tolu nia leten imi husik hela ain-fatin ne’ebé sei la hamoos,” Dom Norberto do Amaral hato’o iha diskursu  hafoin remata misa solene ba restus mortais preladus na’in-haat iha Tasi-Tolu, Kinta-ne’e.

Dom Norberto hanoin fali preladus na’in-tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes ne’ebé mate no hakoi iha Portugál, dook husi povu Timor-Leste, no kleur ona sira dook, halo sente saudades bá figura sira ne’ebé mak fó ona kontribuisaun boot bá rai ida-ne’e no igreja Timor liu-liu iha tempu susar no tempu funu nian. Kleur ona mak ita rona de’it sira nia naran no haree de’it nia imajen.

“Maski mai ho ruin, maibé povu haksolok no agradese ba Maromak tanba ikus mai preladus sira hetan fatin deskansa ikus iha rate ne’ebé dignu,” tenik Dom Norberto.

Bispu Dioseze Maliana afirma, planu atu lori fila restus mortais preladus na’in-tolu ne’e kleur ona. CET diskuti asuntu ne’e iha tinan 2015, bainhira maktoban Dom Basilio do Nacimento sai Prezidente CET. Iha tempu ne’e halo ona aproximasaun ba família sira maibé tanba razaun oi-oin la konsege realiza.

Ikus mai iha tinan ida-ne’e, ho esforsu CET nian iha lideransa Dom Virgílio Cardeal da Silva, SDB nu’udar Prezidente CET, no apoiu másimu husi asembleia CET, maka prosesu transladasaun bele kontinua.

Nia esplika, ba prosesu ne’e presiza kolaborasaun entre Estadu no Governu Timor-Leste, tanba preladus sira konsidera nu’udar Herois Nasionál no iha mós ligasaun ho Governu Portugés. Aleinde ne’e CET mós planu antes ona atu lori hamutuk Dom Alberto Ricardo da Silva nia restus mortais.

“Ho nune’e ami bá hasoru Prezidente Repúblika José Ramos-Horta hodi informa no aprezenta planu transladasaun restus mortais preladus sira nian. No ami kontinua bá hasoru Exelénsia Primeiru-Ministru señór Kay Rala Xanana Gusmão,” Dom Norberto hateten.

Nia dehan, enkontru ne’e determinante no frutuozu tanba Primeiru Ministru apoia hodi forma ekipa konjunta entre Governu no Igreja. Ho komisaun ne’e, servisu, koordenasaun no kooperasaun entre Estadu no Igreja Katólika la’o di’ak tebes hodi fasilita prosesu tomak ho susesu.

Dom Norberto agradese ba família preladus na’in-haat ne’ebé fó kolaborasaun tomak. Nia mós agradese ba Maromak nia domin no ba povu Maromak nian iha rai ida-ne’e ne’ebé ho domin no vontade di’ak partisipa iha serimónia solene hahú husi resepsaun iha Aeroportu, omenajen, reza no misa iha Tasi-Tolu hahú loron 01 to’o 10 Setembru.

Ensera misa solene iha Tasi-Tolu partisipa másimu husi sarani sira rihun ba rihun no serimónia ikus funebre iha Igreja Parokia Katedral Imaculada de Conceicão. Partisipasaun no disponivel hanesan marka ida espesial ba Igreja no nasaun.

Jornalista: Juvinal Cabral / Fidelino de Araújo