Alegada Envolve Jogu Ilísitu, PNTL Detein Xinés Na’in-ualu ho Taiwan Na’in-haat iha Otél Garden Beach

PNTL detein sidadaun estranjeiru na'in-12 iha Otél Garden Beach, Díli, Kuarta-kalan, 09 Setembru 2026.

Díli, 10 Setembru 2026 (RAFA)- Polísia Nasionál Timor-Leste (PNTL), liuhosi Diresaun Servisu Investigasaun Kriminál (DSIK) hamutuk ho Diresaun Servisu Informasaun Polísia (DSIP), Kuarta-kalan, detein Xinés na´in-ualu no Taiwan na’in-haat ne´ebé alegada komete  jogu ilísitu Scam Call Centre iha Otél Garden Beach, Díli.

Sidadaun estranjeiru hamutuk na’in-12 ne’e tama mai teritóriu Timor-Leste ho vistu turista, maibé maioria husi sira nia vistu mate ona ho nune’e sira kontinua over stay no la koopera ho autoiridade Migrasaun.

Tuir observasaun RAFA iha terrenu Otél Garden Beach,  iha tuku 22:30 Otl, ekipa husi DSIK no DSIP tama ba otél refere hodi halo buska, apreensaun no detensaun no sidadaun estranjeiru husi na’in-12 ne’e, na’in-ida laiha pasaporta.

Autoridade Polísia sira mós hetan pasaporte husi sidadaun Pakistan no Índia kuaze 10, maibé ema laiha fatin.

Tuir verifikasaun husi Servisu Migrasaun (SM), sidadaun estranjeiru sira ne’e utiliza vistu turista no maioria vistu refere mate ona.

Autoridade seguransa mós halo apreensaun ba evidénsia sira ne’ebé deskonfia uza ba jogu ilísitu scam call centre mak hanesan  aparelu Starlink rua, telefone unidade 16, laptop ida, karreta ida no ekipamentu seluk tan.

Tuir informasaun husi traballadór iha Otél Garden Beach ne’ebé atu labele públika nia identidade,  haktuir sidadaun estranjeiru sira ne’e hela iha otél kuaze fulan-neen ona no sira arrenda uma ida ho modelu andár rua, iha laran kuartu rua no sala vizita ida, ho folin US$ 4,000.00 kada fulan.

Hafoin halo buska no apreensaun, autoridade seguransa transporta sidadaun estranjeiru sira ne’e hamutuk ho evidénsia sira ba iha edifisiu DSIK Komandu Jerál PNTL hodi kontinua ba prosesu identifikasaun, investigasaun no detensaun.

Jornalista: Juvinal Cabral dos Santos