PM Xanana Haksolok ho Desizaun Tribunál Austrália Rejeita Prosesu US$600 Millaun Husi Lighthouse Hasoru Timor-Leste

PM Xanana Gusmão fila hikas mai Timor-Leste, Kuarta 09 Setembru 2026.

Díli, 09 Setembru 2026 (RAFA) –  Primeiru-Ministru (PM) Kay Rala Xanana Gusmão hatete Governu Timor-Leste haksolok no felesita ba ekipa legál sira ne’ebé durante ne’e esforsu hodi Timor-Leste hetan vitória husi desizaun Tribunál Supremu Estadu Vitória Austrália ne’ebé rezeita prosesu US$600 millaun husi kompaña Lighthouse Corporation  hasoru Timor-Leste.

Primeiru-Ministru (PM) Kay Rala Xanana Gusmão, hato´o nia sentimentu ksolok ne´e ba  jornalista sira, Kuarta-ne’e, liuhosi konferénsia imprensa ne’ebe hala’o iha Aeroportu Internasionál Prezidente  Nicolau Lobato, hafoin fila husi Jarkarta-Indonézia.

Xefe Governu hatete  katak Governu Timor-Leste kontente tebes ho dezisaun Tribunál Supremu Estadu Vitória Austrália, tanba problema  kompaña Lighthouse ho Governu Timor-Leste desde kedan iha tinan 2010.

PM afirma kompaña Lighthouse Corporation, iha momentu ne’ebá haktuir sira iha vontade no koopera ho Governu Timor-Leste atu fornsese jeradores ualu no mós fornese kombustivél durante tinan hitu ba Governtu Timor-Leste, maibé ikus mai kompaña Lighthouse Corporation entrega de’it jeradores rua no ejizi Governu Timor-Leste tenke selu fali ho presu ne’ebé boot.

“Ne’ebé sira ejizi loos dehan ita atu selu kompensasaun ba sira tanba sira lakon entre millaun US$500 ate millaun US$600, tanba ita asina tiha ona kontratu mina sira ne’e ami la ba lori mai ne’e mak ami lakon ne’e, ita atu hamnasa tiha de’it,” PM Xanana Gusmão hateten.

Nune’e iha  tinan hirak liubá kompaña Lighthouse Corporation lori kazu ne’e ba tribunál arbitrajen internasionál hodi keixa Governu Timor-Leste, no lori prosesu tinan naruk nune’e  foin lalais mak  Tribunál Supremu Estadu Vitória Austrália deklara katak rejeita prosesu ho valor US$600 millaun husi kompaña Lighthouse hasoru Timor-Leste,

Tanba Lighthouse la kumpre orden tribunál atu selu  US$1,3 millaun nu’udár garantia ba kustu prosesu antes kazu ne’e tama iba julgamentu.

“Foin daudaun ne’e mak Tribunál iha Vitoria dehan lae ona, ne’ebé ita atu temi karik dehan nia lakon tiha ona kazu ida-ne’e, ita bele hanoin komú nia lakon dalabarak ona sempre rekore halo rekursu, dalaruma nia halo recurs,u maibé depende ba Tribunál dehan labele tanba laiha provás, ne’ebé ita kontente,” PM Xanana Gusmão hateten.

PM Xanana subliña nia parte felesita tebes ho  ekipa legál ne’ebé servisu maka’as tebes no mós  felesita mós ba  juíz sira ne’ebé hola parte iha prosesu no desizaun sira ne’e  tanba bele konsidera lia  loloos.

“Ita kontente tanba ida-ne’e, ita kontente tanba justisa bele halo, ita garantia katak justisa iha no funsiona,” Xefe Governu konklui.

Jornalista : Zita Menezes