Japaun Kompromete Apoiu Timor-Leste Kombate Scam Call Centre

Polísia halibur prova sira iha relasaun ho atividade scam call centre iha uma ida iha Colmera, Díli, foin lalais ne'e.

Díli, 09 Setembru  2026 (RAFA)- Japaun iha kompromisu apoiu Timor-Leste kombate fraude online, liu-liu Call Centre ne´ebé oras ne´e kontinua aumenta no sai preokupasaun sosiedade no estadu Timor nian.

Kestaun ne´e hato’o husi Asesor prinsipál Primeiru-Ministru no Rezidente Komité Asuntu Parlamentár Japaun, Endo Takashi hafoin enkontru bilaterál ho Prezidente Repúblika José Ramos-Horta iha Palásiu Prezidensiál, Díli, Kuarta ne´e, hodi destaka preokupasaun kona-ba Scam Call Centre ne´ebé sai mós preokupasaun no problema ne´ebé mundu enfrenta.

“Ita boot sira mós haré, problema Jogu Online, Scam Call Centre, ida ne’e tama mai Timor-Leste no ida ne’e hanesan problema akontese iha mundu tomak,” Asesor Prinsipál, Endo Takashi hateten.

Endo Takashi mós informa katak, iha Japaun mós enfrenta krime ida ne’e, liu-liu ba ema sira ne´ebé ho idade avansadu, no sira mak hasoru krime hanesan ne´e no ho fasil sira sai vitima.

“Ami ko’alia mós kona-bá ida ne’e ho Prezidente Ramos-Horta, no horsehik mós ami hato’o ami nia preokupasaun, no ami nia hakarak atu koopera hasoru problema ida ne’e ba Prezidente Parlamentu Nasionál, Maria Fernanda Lay” nia informa.

Asesor prinsipál Primeiru-Ministru no Rezidente Komité Asuntu Parlamentár Japaun, Endo Takashi subliña iha Timor-Leste laran mós sai ona hanesan sentru Scaming Online barak ona no ida ne´e lori risku ba país ne´e.

Jornalista: Cristina Ximenes