Delegasaun Deputadu husi Japaun ho Xefe Estadu Diskute Kooperasaun iha Área Importante Tolu

Delegasaun parlamentár husi Japaun hasoru malu ho Prezidente Repúblika, José Ramos-Horta iha Palásiu Prezidentensiál, Tersa 09 Setembru 2026.

Díli, 09 Setembru 2026 (RAFA)- Delegasaun deputadu na’in-tolu husi  Japaun hasoru malu ho Prezidente Repúblika, José Ramos-Horta, hodi diskute kooperasaun iha área importante tolu hanesan infraestrutura, investimentu no rekursu umanu ba dezenvolvimentu iha Timor-Leste.

Membru PN  na’in-tolu reprezenta deputadu sira husi Japaun ne’ebé mai vizita Timor-Leste no hasoru Prezidente Repúblika José Ramos-Horta hafoin hasoru malu ho Prezidente Parlamentu Nasionál Fernanda Lay.

Asesor Prinsipál ba Primeiru-Ministru no Rezidente Komité Asuntu Parlamentár Japaun, Endo Takashi informa , iha sira-nia enkontru ho Prezidente Repúblika José Ramos-Horta halo diskusaun oi-oin kona-bá dezenvolvimentu Timor-Leste nian no haré katak iha pasu pozitivu no Timor-Leste mós ofisialmente hanesan ona membru ASEAN no iha tinan 2029 sei asume responsabilidade ba Prezidensia ASEAN .

“Ami ko’alia liu kona-bá infraestrutura, kona-ba ekonómia, no mós investimentu depois kona-bá rekursu umanu mós. Kona-bá infraestrutura la’ós área espesifiku ida-idak, maibé ko’alia jerál, depois primeiru nu’udar deputadu husi Japaun ami mós hato’o ami nia agradesimentu ba Prezidente Repúblika,”  Endo Takashi informa.

Asesor Prinsipál ne´e hatutan, koopera Japaun ho Timor-Leste sei kontinua iha área hotu-hotu no sei haré mós ba área prioridade sira ne´ebé Timor-Leste nesesita no iha Timor-Leste iha mós Embaixadór Japaun, Yasushi Yamamoto, tanba ne´e ba oin sei haklean liuán kooperasaun no Prezidente Repúblika no estadu Timor-Leste bele hato’o hanoin nafatin ba Embaxadór atu Japaun kontinua apoiu país Joven ida-ne´e.

Endo Takashi mós haktuir kona-bá investimentu ne´ebé empreza Japaun Tsuneishi Ship Building halo iha Laleia, ba produsaun (Fabrika) Ró no mós empreza  Itochu ne´ebé sei halo konstrusaun ba Solar Painel, atu fornese eletrisidade, inklui empreza japaun seluk ne´ebé mos halo atividade negosiu ne´ebé atu apoiu mos kresimentu ekonomia iha país ne´e.

Ikus liu delegasaun Parlçamentar sira husi Japaun mos husu ba Media iha Timor-Leste haree ba realidade sira ne´ebé realistiku, servisu hamutuk hodi hametin relasaun amizade entre Timor-Leste ho Japaun ohin no ba Futuru.

Jornalista: Cristina Ximenes