Undana ho Konsuladu Timor-Leste iha Kupang Reforsa Kooperasaun Ba Investigasaun Fronteira no Ensinu Lian Portugés

Undana Kupang- Indonézia ho Konsuladu Timor-Leste ba Kupang, estabelese akordu kooperasaun atu reforsa kooperasaun iha investigasaun kona-bá fronteira komun no ensinu lian portugés

Kupang, 9 setembru 2026 (RAFA) – Universidade Nusa Cendana (Undana) iha Kupang- Indonézia ho Konsuladu Timor-Leste ba Kupang, estabelese akordu  kooperasaun atu reforsa kooperasaun iha investigasaun kona-bá fronteira komun no ensinu lian portugés.

Reitór Undana, Jefri Bale,  Tersa-ne’ e, informa universidade buka parseria akadémika ho Timor-Leste tanba iha relasaun jeográfika no kultura ne’ ebé nasaun rua ne’ e partilla, nia mos subliña kooperasaun ida ne’ ebé besik liu iha ensinu superior bele ajuda rai rua ne’ e alkansa progresu komun.

Iha reuniaun ho konsul Timor-Leste ba Kupang, Espedito da Conceição Ribeiro, no adidu Edukasaun, Gregório do Santo, responsável sira husi Undana halo akordu atu reforsa kooperasaun iha investigasaun kona ba kestaun fronteirisa no servisu hamutuk iha fronteira entre Indonézia no Timor-Leste foku ba problema Ambiental husi basia hidrográfika sira no mos iha lokal sira ne’ eb’e iha potênsia ba pontu pasajen fronteirisa.

Parte rua mos sei esplora liu tan kona ba kriasaun sentru Lian Portugés iha Kupang, iha ne’ ebé Undana maka sei oferese kursu no manorin sira sei oferese husi Universidade Nasional Timor Lorosa’e (UNTL).

Halo mós akordu  kona-bá habelar interkâmbiu ba estudante sira, inisiativa ho envolvimentu komunitáriu iha zona fronteirisa sira no programa servisu estudantil transfronteirisu, aliende abertura ba vaga pós-graduasaun sira iha Undana ba estudante Timor oan sira no mos realizasaun regular ba forum sientífiku Intersanasional sira.

Ribeiro hatete husi parte Timor-Leste sei aprezenta rezultadu husi enkontru sira ba ministériu no instituisaun kompetente sira hodi fo seguimentu ba inisiativa ne’ e, nia haktuir mos katak konsuladu mos sei fasilita konversasaun ho Universidade Nasional Timor Lorosa’ e kona ba aula portugés sira, inklui mos apoiu dosente husi instituisaun ne’ e.

Hein katak kooperasaun ne’ e bele hametin papel universidade sira iha dezenvolvimentu rejiaun fronteirisa , hadiak rekursu umanu sira no haklean relasaun akadémiku sira entre Indonézia no Timor-Leste. RAFA