HABADA Husu Komandante Jerál PNTL Aselera Prosesu Rekrutamentu Ba Kadete Foun

Diretor Ezekutivu Asosiasaun Hali Ba Dame (HABADA), Abel Amaral.

Díli, 08 Setembru 2026 (RAFA) – Diretor Ezekutivu Asosiasaun Hali Ba Dame (HABADA), Abel Amaral, husu Komandante Jerál Polísia Nasionál Timor-Leste (PNTL), Komisáriu Assistente Polísia Afonso dos Santos, atu aselera prosesu rekrutamentu ba kadete foun, tanba i importante tebes hodi responde ba nesesidade seguransa no ordem públika iha Timor-Leste.

“Ita husu ba Komandante Jerál PNTL atu acelera rekrutamentu. Karik iha falha ruma ne’ebé la merese, Komandante Jerál labele ezersa intervensaun polítika. Se iha intervensaun polítika, tenke fó sai no hato’o ba públiku, para bele hatene oinsá atu hadia,” hatete Diretor Ezekutivu HABADA, Abel Amaral ba jornalista sira iha edifísiu HABADA,  Díli, Tersa-feira.

HABADA konsidera prosesu rekrutamentu tenke hala’o ho transparénsia no presiza envolve instituisaun independente sira, hanesan Provedoria dos Direitos Humanos e Justiça (PDHJ) no reprezentante sosiedade sivíl. Tamba atu garante transparénsia, tenke envolve parte hotu nune´e bele hare ho rigor prosesu hotu no evita iha sira ne´ebé bele lori imajen negativu ba instituisaun estadu ne´e.

“Ita haree Ministru Interiór hatun ona despaxu iha fulan rua liu ba, atu Komandante Jerál PNTL bele loke no hahú rekrutamentu. Maibé to’o agora ita la hatene prosesu ne’e lao oinsá. Ami husu ba Komandante Jerál atu fó sai ba públiku kona-ba prosesu ne’e lao oinsá, tanba iha ekipa sekretariadu foun,” nia preokupa.

HABADA husu mós atu prosesu rekrutamentu ne’e labele lao iha nonok nia laran, maibé informasaun kona-ba progresu no prosesu tenke klarifika no hato’o ba públiku.

Iha fatin seluk, banihira jornalista sira husu ba Komandante Jerál PNTL, Komisáriu Asistente Afonso dos Santos, kona-ba prosesu rekrutamentu nian maibé lakohi fo komentariu no husu parte hotu hein deit.

“Seidauk. Sira bele hein, prosesu ne’e PNTL sei haré. Ha´u la responde,” hatete Komisáriu Asistente Afonso dos Santos, hodi hatan ba jornalista sira iha Edifisiu UPM, Lecidere, Dili, tersa-ne´e.

Antes ne´e, fó sai oha ba públiku katak, Sekretariadu Rekrutamentu envolve mós Polísia Austrália, Portugal, Funsaun Públika no PNTL, ne’ebé hotu-hotu tenke assume responsabilidade iha prosesu rekrutamentu foun ne’e.

Jornalista: João Carlos / Juvinal Cabral