Pasiente Partu Aumenta, Kama Maternidade iha HNGV Limitadu

HNGV, Díli.

Díli, 8 Setembru 2026 (RAFA)  – Diretór Servisu Asisténsia Klíniku iha Ospitál Nasionál Guido Valadares (HNGV), Eligio Agostinho Araújo da Silva,  rekoñese kama maternidade limitadu tanba númeru inan  sira ne’ebé mai partu aumenta kada loron.

Situasaun ne’e halo HNGV enfrenta overload ka sobrelotasaun, tanba kama ba maternidade  iha deit unidade 56 no kada loron atendimentu ba inan partu ho númeru mínimu  na’in-20.

“Ita seidauk konta pasiente sira ne’ebé halo operasaun eletiva ba problema maternidade. Tanba ne’e, ita enfrenta situasaun ida-ne’e no kama la to’o ba pasiente hotu,” Eligio Agostinho hateten ba jornalista sira, iha HNGV, Tersa-ne’e.

Nia esplika katak, bainhira númeru inan sira ne’ebé mai partu barak liu kapasidade kama nian, pasiente ne’ebé kondisaun estável sei akomoda tuir espasu ne’ebé disponivel, enkuantu bebé sira kontinua hetan kuidadu.

Diretór  Eligio Agostinho haktuir situasaun ida ne’e  HNGV enfrenta hela kuaze loron-loron overload, la’ós de’it iha maternidade, maibé mós iha departamentu sira seluk, hanesan Medisina Interna.

Aleinde aumentu populasaun kada loron mós sai nu’udar fatór ida ne’ebé kontribui ba aumentu númeru pasiente sira iha HNGV.

Atu responde ba situasaun ne’e, nia  dehan Ministériu Saúde no Governu halo hela konstrusaun edifísiu foun ba preparasaun Departamentu Maternidade.

Edifísiu ho andár haat ne’e, agora konstrusaun atinji ona 35 porsentu no espera katak bele remata iha tinan oin bele minimiza problema overload, liuliu iha maternidade.

Nia hatutan HNGV mós koordena ho Servisu Saúde Munisípiu Díli atu inan sira ne’ebé halo partu normal bele hetan atendimentu iha sentru saúde sira ne’ebé besik.

Diretór Servisu Asisténsia Klíniku relata katak bainhira HNGV enfrenta sobrelotasaun, pasiente sira ne’ebé kondisaun di’ak ona no atinji rekizitu alta sei hetan avaliasaun husi doutór sira atu fó alta lalais, hodi bele fó espasu ba pasiente foun sira.

Ba pasiente sira ne’ebé halo operasaun cesariana, normalmente presiza hela iha ospitál durante loron rua to’o tolu, depende ba kondisaun saúde, antes doutór fó alta.

Nia informa katak, totál kapasidade kama iha HNGV hotu atualmente hamutuk 465. Maibé, tanba númeru pasiente aumenta, HNGV buka alternativa hodi aumenta kama, inklui uza espasu iha koridor.

“Kada loron pasiente ne’ebé tama liu husi emerjénsia ita atende mínimu 180, no loron ruma bele to’o 250. Tanba ne’e, kama hirak ne’e seidauk sufisiente,” Eligio Agostinho preokupa.

Eligio Agostinho hateten katak, limitasaun espasu sai dezafiu boot ba HNGV atu aumenta tan kama. Ne’e mak situasaun real ne’ebé ospitál enfrenta.

Iha fatin hanesan, pasiente Felicidade da Cruz relata katak nia enfrenta difikuldade kona-ba falta fatin toba iha HNGV. Nia mai ospitál durante loron lima no foin partus iha loron horseik.

“Ha’u rasik hasoru problema. Ida-ne’e la’ós ha’u mesak. Maibé, ema barak mós hasoru problema hanesan fatin toba. Balu toba de’it iha li’ur nahe kaixa hodi toba, depois haree oan,” tenik inan partus ne’e.

Felicidade da Cruz  dehan katak, iha situasaun balu bebé sira toba iha laran no inan toba iha li’ur. Nu’udar inan ne’ebé foin partus sente triste tebes bainhira rai malirin.

Nia mós husu Governu atu tau atensaun ba kondisaun fatin iha Departamentu Maternidade, liuliu ba inan sira ne’ebé foin partus, atu bele hetan fatin toba ne’ebé apropriadu no kuidadu bebé ho di’ak.

Felicidade da Cruz  konsidera katak falta fatin toba bele aumenta preokupasaun ba inan sira ne’ebé foin partus, liuliu bainhira presiza fó susu no kuidadu bebé no atendementu husi parteira sira di’ak. Maibé difikuldade mak fatin toba laiha tanba kama sira nakonu hotu.

Jornalista: Cesarina de Carvalho