Opozisaun Lamenta Relatóriu Banku Mundiál Ne’ebé Indiká Timor-Leste Okupa 71,7% Liña Pobreza

Imajen/Reprodusaun

Díli, 08 Setembru 2026 (RAFA) – Membru Parlamentu Nasionál husi Bankada oposizaun Kmanek Haburak Unidade Nasionál Timoroan (KHUNTO) ho Frente Revolusionáriu Timor-Leste Indepedente (FRETILIN) lamenta ho relatóriu banku mundiál ne’ebé indiká Timor-Leste okupa 71,7% liña pobreza.

Xefe Bankada KHUNTO Deputadu Antonio Verdiál de Sousa ba jornalista sira iha Palrmanetun Nasionál, Tersa-ne’e hatete, relasiona ho  dadus banku mundiál ne’ebé indiká  Timor-Leste tama iha liña pobreza iha numerú 71,7% ne’e,  husu ba orgaun ezekutivu liuliu IX Governu konstituisionál atu kaer no haré ba asuntu  ne’e ho  didi’ak no  fiar katak IX Governu iha posibilidade atu trata asuntu ne’e ho didi’ak.

“Tanba saida mak hanesan ne’e, tanba saida mak sa’e maka’ás tebes-tebes,  hanesan Deputadu hamrik iha povu nia oin ho matan-been husu ba Governu favor boot ida kaer ba dadus ne’e favor Governu hadi’a aan hodi servisu ba nasaun no ba povu ida-ne’e,” Deputadu Antonio Verdial hateten.

Iha fatin hanesan membru Bankada FRETILIN Deputadu David Dias Ximenes Mandati,  lamenta ho  relatóriu  husi Banku Mundiál  ne’ebé antes ne’e Timor-Leste tama iha liña pobreza iha numerú 41% no agora sa’e ba 71,7%.

Nia afirma tuir loloos Governu redúz numerú pobreza la’ós hasa’e fali numerú pobreza tanba kada tinan Governu sempre  apová Orsamentu Jerál Estadu (OJE)  hodi halo dezenvolvimentu maibé ninian  retornu hatudu rezultadu ladún di’ak.

Reprezentante povu ne’e husu  Ministériu Finansa ne’ebé jere orsamentu jerál estadu (OJE) no mós Ministériu Solidariedade Sosiál no inkluzaun (MSSI) mak tenke haré numerú pobreza iha Timor-Leste 71,7% nia fundamentu no kauza ne’e husi saida hodi bele fó solusaun.

“Tanba uluk 41% depois ita gasta osan barak depois ita halo ita nia sidade luan hanesan mós mais pobreza ne’e iha fali entaun signifiká ita nian dezenvolvimentu ne’e dezenvolvimentu  kozmetikú la’ós dezenvolvimentu povu ninian substánsia rasik ida-ne’e ita hotu-hotu lamenta,” Deputadu David Dias Mandati hatete.

Reprezentante povu ne´e mós  husu atu i  Komisaun Anti-Korrupsaun (CAC siglá portugés), tenke másimu halo kontrolu ba asuntu korrupsaun iha Timor-Leste nune’e  bele halo redúz ba pobreza iha Timor-Leste no husu Governu no parte relevante hotu-hotu hamutuk hodi  buka solusaun ba liña pobreza iha Timor-Leste.

Jornalista : Zita Menezes