Sentru Formasaun PNTL Preparadu Simu Ajente Foun Na’in-750

Komandante Sentru Formasaun Polísia Nasionál Timor-Leste (PNTL) Superintendente Polísia Basilio de Jesus.

Díli, 08 Setembru 2026 (RAFA)-Komandante Sentru Formasaun Polísia Nasionál Timor-Leste (PNTL) Superintendente Polísia Basilio de Jesus informa, sentru formasaun iha ona faze preparasaun finál hodi simu kadetes rekrutamentu foun na’in-750 hodi tuir formasaun ne’ebé sei hala’o iha fatin tolu durante fulan-neen.

“Konforme orientasaun sua exselensia Komandante Jerál nian katak númeru rekrutamentu hamutuk na’in-750, sé ita ko’alia ho kondisaun sentru formasaun. Agora dadaun sentru formasaun Comoro, ita sei uza fatin tolu mak primeiru sentru formasaun Comoro Díli ita sei simu na’in-250, segundu sentru formasaun Rairobo Atabae mós na’in-250 no terseiru iha sentru formasaun kompania Unidade Polísia Maritima (UPM) Atabae,” Superintendente Polísia Basilio de Jesus  inform aba  jornalista sira iha Sentru Formasaun Polísia Comoro Díli, Segunda-ne’e.

Superintendente Polísia Basilio de Jesus  informa, sentru formasaun Comoro kuaze preparadu ona 99%. Sala eskola, dormitóriu no kazerna ba feto no mane, inklui fatin ba han, hotu-hotu preparadu ona. Tanba ne’e bainhira simu kadetes na’in-250 sei la iha problema.

Ba sentru formasaun Atabae, preparasaun atinji ona 98%. Iha ne’ebá menus buat balun presiza hadi’a iha Rairobo problema oituan hariis fatin ba feto sira seidauk sufisiente, ida seluk mak resintu sentru formasaun Rairobo iha tahu iha tempu udan. Nune’e mós ba sentru formasaun kompañia UPM Atabae, Ajénsia Dezenvolvimentu Nasionál (ADN) halo ona levantamentu no dezeñu kompletu. Fatin ne’e tinan 30 ona, tanba ne’e presiza renovasaun. Semana ne’e kompañia vensedór sei hahú reabilitasaun hodi prepara ba ajente na’in-250.

Komandante Basilio esplika, formasaun ba ajente foun sira sei iha etapa tolu, etapa primeiru mak forma karakter mental no fízika durante fulan rua, etapa segundu formasaun eskolar kona-ba siénsia polísial, Lei no direitu umanus atu transforma mental joven ba mental polísia  no ikus liu formasaun prátika servisu no aprende kona-ba funsionamentu polísial iha munisípiu-14.

Sentru formasaun iha ona faze preparasaun, rekursu matériais no formador iha sentru formasaun bá ajente foun sira kuaze na’in-90 maibé na’in-80 sai efetivu bá formador, tanba na’in-10 hanesan iha kondisaun saúde no idade tau iha seguransa.

Komandante Sentru Formasaun Polísia ne’e dehan, sentru formasaun la involve iha prosesu rekrutamentu. Sentru sei hein de’it entrega husi Komandu Jerál. Bainhira rekrutamentu final ona, sei presiza loron 2 ka 3 hodi distribui kadetes na’in-750 ba fatin tolu.

“Asuntu rekrutamentu ne’e sentru formasaun la involve, sé formasaun nia prepara nia orariu bainhira mak rekrutamentu ne’e final ona entrega mai ona sentru formasaun, hafoin sentru formasaun realiza deflamasaun. Agora dadaun ami seidauk bele termina data porque hein rekrutamentu ne’e,” nia haktuir.

Abertura ba formasaun sei konsentra iha Díli. Remata abertura hafoin fahe kadetes na’in-250 ba sentru formasaun tolu.

Ba kualidade formasaun, CFP iha koordenasaun ho Guarda Nasionál Repúblikana (GNR) husi Portugál, Timor-Leste Police Development Program (TLPDP) no Unidade Espesial Polísia (UEP) hodi fó apoiu ba matéria teoria no prátika.

“Ita iha liña koordenasaun tanba iha formasaun ne’e ita iha mós pesoal balun mai husi GNR parte matéria balun ne’ebé relevante. Inklui mós parte TLPDP sira mós tulun ita iha ne’ebá matéria ne’ebé mak fó teoria no prátika balun TLPDP mós fó apoiu, talves pesoal la iha maibé sira apoiu material,” dehan komandante sentru formasaun.

Nia espera katak ho apoiu husi parseiru sira, kadetes sira bele sai ho kualidade iha tempu fulan neen nia laran.

Jornalista: Juvinal Cabral / Fidelino de Araújo