Timor-Leste ho Sri Lanka Trata Kooperasaun iha Setór Saúde Públika

Ministru Bendito dos Santos Freitas hasoru malu ho Ministru Saúde Sri Lanka, Hon. Dr. Nalinda Jayatissa, Tersa 08 Setembru 2026.

Díli, 8 Setembru 2026 (RAFA) –  Ministru Negósiu Estranjeiru no Kooperasaun (MNEK) Bendito dos Santos Freitas ho  Ministru Saúde Sri Lanka, Hon. Dr. Nalinda Jayatissa, Tersa-ne’e, hasoru malu hodi trata posibilidade estabelese kooperasaun bilateral, liuliu iha setór saúde publika.

Ministru Negósiu Estranjeiru no Kooperasaun  Bendito dos Santos Freitas informa ba joranalista katak vizita no enkontru Ministru Saúde Sri Lanka ho MNEK  ho objetivu atu diskute posibilidade kooperasaun entre Governu Timor-Leste no Sri Lanka.

Nia mós relata maske Timor-Leste seidauk iha kooperasaun barak ho Sri Lanka, maibe iha hasoru-malu ne’e sira diskuti asuntu kona-bá komunikadu konjunta ida ne’ebé estabelese iha Nova Iorke, iha  loron 4 fulan-Maiu tinan 2002.

“To’o agora ita seidauk iha segmentu ida ne’ebé konkreta liu. Entretantu, prezensa Ministru ne’e hatudu vontade di’ak atu estabelese parseria kooperasaun bilateral entre Governu Timor-Leste no Sri Lanka,”  Ministru Bendito dos Santos Freitas informa.

Iha enkontru ne’e, parte rua mós diskute kona-bá prioridade saúde públika, dezenvolvimentu no formasaun ba profisionál saúde, asuntu farmaséutiku no área sira seluk ne’ebé bele sai oportunidade ba kooperasaun bilateral.

Ministru Saúde Sri Lanka, Hon. Dr. Nalinda Jayatissa, hatete Timor-Leste ho Sri Lanka iha ona relasaun diplomátika, ho Komunikadu Konjunta ne’ebé estabelese iha Nova Iorke.

Tuir nia, enkontru ho MNEK sai oportunidade atu lori relasaun ne’e ba kooperasaun ne’ebé konkreta liu. Tanba, Governu Timor-Leste hatudu ona vontade atu estabelese parseria bilateral entre nasaun rua.

“Ita iha oportunidade boot atu servisu hamutuk no fahe esperiénsia. Ministru Bendito dos Santos Freitas hatudu vontade atu estabelese parseria bilateral entre nasaun rua,” tenik Ministru Saúde Sri Lanka.

Nia mós hatete katak Timor-Leste no Sri Lanka agora iha oportunidade atu hametin relasaun bilateral, inklui iha área komérsiu, investimentu no dezenvolvimentu.

Ministru Saúde Sri Lanka  konvida investidór sira husi Timor-Leste atu haré oportunidade investimentu iha Sri Lanka, liuliu iha indústria no setor farmaséutiku, no mós konvida povu Timor-Leste atu vizita Sri Lanka.

“Agora tempu di’ak atu hahú estabelese relasaun forte entre Timor-Leste no Sri Lanka. Tanba, ita rua nu’udar nasaun illa no iha oportunidade atu fahe esperiénsia no servisu hamutuk iha área oioin,” Hon. Dr. Nalinda Jayatissa hateten.

Ministru Saúde Sri Lanka mós afirma sira prontu atu fahe esperiénsia tanba Timor Leste hetan ona vitória barak iha saúde públika.

Jornalista: Cesarina de Carvalho