Voo Citilink Díli-Denpasar Kanseladu Ba Loron Daruak Tanba Sinza Vulkánika

Díli, 7 Setembru 2026 (RAFA) – Timor Airways konfirmadu katak voo Citilink entre Díli no Denpasar kanseladu tan iha Segunda-ne’e, ba loron daruak tuir malu, tanba sinza vulkánika ne’ebé sai husi erupsaun Anak Krakatau iha Indonézia.

Timor Airways, reprezentante lokál Citilink iha Timor-Leste ne’ebé opera rota Díli-Denpasar, informa iha nia pájina ofisiál Facebook katak voo QG500 no QG501 sei kanseladu iha Segunda-ne’e tanba “razaun forsa maior”, tanba poeira vulkánika bele hamosu risku ba seguransa no operasaun aviasaun.

Tuir Timor Airways, operasaun voo Díli-Denpasar bele hahú fali iha loron ida ka rua, depende ba evolusaun situasaun no atualizasaun ne’ebé sei publika liuhusi NOTAM aeroportu Jakarta.

Kanselamentu ne’e akontese hafoin iha Domingu, Timor Airways informa katak erupsaun Anak Krakatau afeta operasaun voo sira.

Iha loron ne’ebá, voo Citilink iha rota Jakarta-Denpasar-Díli no Díli-Denpasar-Jakarta kanseladu. Timor Airways hateten katak sei fó informasaun foun kona-bá situasaun ne’e iha loron tuir mai.

Iha komunikadu ne’ebé divulga iha Domingu, Citilink informa katak voo hotu-hotu ba no husi Jakarta, inklui aeroportu Soekarno-Hatta no Halim Perdanakusuma, no mós voo sira ba no husi Bandung no Tanjung Karang, kanseladu to’o tuku 12:00 iha Segunda-feira.

Citilink garante ba pasajeiru sira ne’ebé afetadu katak sira bele muda data viajen la ho kustu adisionál ka hili atu simu fila osan tomak husi billete. Ba informasaun liután kona-bá mudansa data ka reembolsaun, pasajeiru sira bele kontaktu sentru atendimentu kliente Citilink nian.

Erupsaun Anak Krakatau, vulkaun ne’ebé lokaliza iha Estreitu Sunda, entre ilha Java no Samatra, hahú iha Sesta, 4 fulan-Setembru. Erupsaun dahuluk remata iha Domingu-dadér, no iha loron ne’ebá vulkaun ne’e erupte tan dala rua.

Erupsaun dahuluk akontese iha tuku 03:53 dadér no dura 30 segundus. Besik oras tolu depois, Anak Krakatau erupte tan, ho durasaun 16 segundus. Imajen husi kámara vijilánsia hatudu ahi sai husi kratera vulkaun.

Ajénsia Meteorolojia, Klimatolojia no Jeofízika Indonézia (BMKG) identifika cinza vulkánika rua. Kalohan dahuluk iha altitude besik 6.100 metru no dada ba nordeste, liu Jakarta, Banten no Java Osidentál.

Kalohan daruak iha altitude besik 15.200 metru no espalha ba Banten, Lampung, Bengkulu no tasi Índiku iha oeste Samatra.

Durante Domingu, sinza vulkánika ne’e hamosu problema boot liután ba operasaun voo sira, ho númeru voo kanseladu no atrazadu aumenta.

Iha kontajen dahuluk iha dadér, aeroportu internasionál Soekarno-Hatta, iha Tangerang, rejista movimentu voo 209 ne’ebé kanseladu, afeta pasajeiru besik 22.798, tuir dadus husi operadór Angkasa Pura Indonesia (InJourney Airports).

Autoridade sira estende tempu fechamentu aeroportu sira liuhusi NOTAM, tanba cinza vulkánika sei iha espasu aéreu iha área Jakarta.

Iha Domingu, númeru aeroportu ne’ebé taka aumenta husi neen ba ualu. Ho nune’e, totál pasajeiru ne’ebé afetadu aumenta besik ba 170.000, enkuantu voo 1.558 kanseladu ka atrazadu, inklui liu 900 iha aeroportu Soekarno-Hatta.

Aleinde Soekarno-Hatta no Halim Perdanakusuma, iha Jakarta, aeroportu Radin Inten II, iha Lampung, no Husein Sastranegara, iha Bandung, mos taka tanba impaktu poeira vulkánika.

Ministru Transportes Indonézia, Dudy Purwagandhi, anunsia katak aeroportu ualu (8) sei taka to’o meia-noite Domingu. Ba Soekarno-Hatta, prazu fechamentu depois estende to’o tuku 08:59 segunda-feira dadér.

Perturbasaun mos afeta aeroportu internasionál Ngurah Rai, iha Bali, ne’ebé sai ligasaun prinsipál Timor-Leste ba rai-liur.

Citilink no transportadór aéreu sira seluk kansela ka muda oráriu voo ba no husi Jakarta. Maski nune’e, jestaun aeroportu informa katak operasaun jerál terminal kontinua normal.

Tanba poeira vulkánika kontinua iha atmosfera, Ajénsia Nasionál Jestaun Dezastre Indonézia (BNPB) anunsia operasaun induzaun udan, ka “cloud seeding”, atu ajuda hamós poeira vulkánika husi atmosfera.

Governu Indonézia mos autoriza eskola sira iha zona afetada atu hala’o ensinu a distánsia temporariamente.

Diretora Ajénsia Jeolójika Indonézia, Lana Saria, hateten katak atividade Anak Krakatau intensifika ona desde Jullu. Nia hateten katak erupsaun iha Domingu mak forte liu durante períodu ne’e, maibé seidauk bele prevé se sei akontese erupsaun boot liután.

Seidauk iha relatóriu kona-bá vítima tanba erupsaun ne’e, no autoridade sira seidauk fó orden atu ema sira sai husi área ne’e. Maibé, autoridade sira husu ema hotu atu la tama iha zona seguransa, ne’ebé estende to’o quilómetru tolu husi kratera vulkaun.

Anak Krakatau, ne’ebé signifika “oan Krakatau”, moris iha kaldeira ne’ebé forma depois erupsaun boot Krakatau iha tinan 1883. Erupsaun ne’e konsidera nu’udar erupsaun ida husi vulkánika ne’ebé halo vítima barak liu iha istória, ho ema liu 36.000 mak mate.

Iha tinan 2018, erupsaun Anak Krakatau provoka tsunami ida iha Estreitu Sunda, ne’ebé afeta área tasi-ibun iha Java no Samatra no hamate ema pelumenus 430. RAFA