Ezekusaun OJE 2026 Ba RAEOA Atinze 31%

Prezidente Autoridade Rejiaun Administrativa Espesiál Oé-Cusse Ambeno (RAEOA), Régio Serventes Romeia da Cruz Salu.

Díli, 04 Setembru 2026 (RAFA)- Prezidente Autoridade Rejiaun Administrativa Espesiál Oé-Cusse Ambeno (RAEOA), Régio Serventes Romeia da Cruz Salu, informa ezekusaun Orsamentu Jerál Estadu (OJE) tinan 2026 ba RAEOA agora atinze 31% no garante katak to’o fulan-Outubru bele atinze 45%.

“Ezekusaun OJE 2026  ba  RAEOA agora atinze 31%, mais ne’e inklui ho kompromisu 40%, obrigasaun sira, mais agora real ne’e 31%. Programa prióridade ita halo ona mak aspetu sosiál, edukasaun, infraestrutura bázika sira, ne’e la’o nafatin,” Prezidente Autoridade RAEOA, Régio Serventes Romeia da Cruz Salu informa ba jornalista sira hafoin seremónia Asina Kontratu Interadministrativu kona-bá Transferénsia Jestaun no Utilizasaun, Afetasaun no Entrega Imóvel ba Instalasaun no Funsionamentu Uma Mahon RAEOA iha Salaun MSSI  Díli, Sesta-ne’e.

Prezidente Autoridade ne’e esplika, uluk hotu-hotu akompaña katak, infraestrutura bázika liu-liu sira ne’ebé kategória Fundu Espesiál Dezenvolvimentu Ezekusaun sei zero hela, agora sa’e ba 28% ne’e di’ak.

“Ita espera katak to’o fulan-Outubru ita nia ezekusaun bele ba to’o 45%. Nune’e,  tinan-ne´e nia rohan, ami mós esforsu signifikativa nune’e RAEOA bele repete hanesan tinan kotuk, ami nia ezekusaun ne’e sa’e to’o 80%,” nia esplika.

Regio da Cruz Salu argumenta katak, la’ós kestaun pursentu tenke sa’e, mais kualidade ezekusaun ne’e tenkeser iha benefisiu ba povu ida ne’e.

OJE 2026 ba RAEOA iha hamutuk millaun 60 USD no husi orsamentu ne’e aloka ba salariu no vensimentu 8,211.073 USD, bens no serbisu  6,779,829 USD, transferensia publika 4,274,900 USD, kapital menor 2,571,801 USD, no kapital dezenvolvimentu 951,391 USD.

Husi montante millaun 6 USD0 ne’e,  37.211.006 USD  aloka ba Fundu Espesial Dezenvolvimentu (FED) ne’ebé destina ba salariu no bensimentu 320,814 USD, bens no serbisu 12,795,594 USD, transferensia públika 1,435,000 USD, kapital menor rihun 429 USD, no kapital dezenvolvimentu 22,230,598 USD ne’ebé finansia programa 13.

Tuir livru OJE 2026, orsamentu ne’e finansia programa 21 ne’ebe abranje ba Edukasaun, Saude, Protesaun Sosial, Administrasaun, Infraestrutura no Agrikultura.

Jornalista: Cristina Ximenes