Prezidente Repúblika ho Igreja Katólika Inaugura Ponte Mgr. Martinho da Costa Lopes

Ponte Manatuto hanaran ponte Monseñor Martinho da Costa Lopes.

Manatuto 03 Setembru 2026 (RAFA)- Prezidente Repúblika, José Ramos-Horta hamutuk ho Igreja Katólika no Governu Timor-Leste, Kinta-ne’e, iha Manatuto,  ofisialmente inaugura ponte Monseñor ka Mgr. Martinho da Costa Lopes”.

Inaugurasaun ne’e sai nu’udar forma ida atu fó onra no prezerva memória Saudozu Mgr. Martinho da Costa Lopes, hanesan figura ne’ebé konsidera iha kontribuisaun importante ba povu Timor-Leste liu-liu iha luta ba independénsia.

Prezidente Repúblika, José Ramos-Horta hateten katak desizaun ne’e rasik mai husi Primeru-Ministru Xanana Gusmão no nia konkorda ho desizaun ne’e. Tan ba Dom Martinho iha istória Timor-Leste nu’udar figura ne’ebé sai hanesan ponte entre loromonu no lorosa’e, no mos entre komunidade ho relijiaun no kultura diferente sira.

“Dom Martinho hanesan ponte ida ne’ebé hakat mota, hakat fronteira, hakat loro-monu no loro-sa’e. Ponte ida-ne’e Manatuto lori nia naran. Ponte Dom Martinho nian sei kontinua nia legadu ne’ebé nia husik ba ita,” Ramos-Horta hateten.

Xefe Estadu hatutan katak legadu Dom Martinho la limita de’it ba área relijiaun, maibé mós iha relasaun ho unidade nasional, kultura no koezaun sosiál. Dom Martinho konsidera iha relasaun di’ak ho komunidade hotu, inklui ema sira ho relijiaun diferente.

Iha fatin hanesan, Prezidente Autoridade Munisípiu Manatuto, Luis Inacio Henrique Fernandes, hateten katak desizaun ne’e sai onra boot ba povu Manatuto, tanba Dom Martinho da Costa Lopes la’ós de’it líder Igreja Katólika, maibé mós figura ne’ebé iha kontribuisaun importante iha luta ba ukun-rasik-an Timor-Leste.

“Hodi povu Manatuto nia naran, hakarak agradese ba Governu no Estadu ida-ne’e ba laran luak tomak, tanba fó onra ba ita-nia eroi Dom Martinho da Costa Lopes. Nia la’ós de’it iha lideransa ba Igreja, maibé mos kontribui ba luta ita-nia ukun-rasik-an,” hatete Prezidente Autoridade Munisípiu Manatuto Luis Inacio Henrique Fernandes.

Prezidente Autoridade ne´e konsidera atribui naran Dom Martinho ba ponte ne’e nu’udar símbolu importante, tanba Dom Martinho durante nia moris sai hanesan “ponte” ne’ebé liga ema, kultura no komunidade sira iha Timor-Leste.

Marka prezensa iha serimonia inagurasaun ba Ponte Mgr. Martinho da Costa Lopes ne´e, Prezidnete Repúblika José Ramos-Horta, Membru Governu, Lider sira Igreja Katólika nian, sarani sira, autoridade sira Munisípiu Manatuto, Relijiozu no Relijioza sira, autoridade sivil no militár no mós lia-na’in sira ne´ebé mós fo omenajen liuhosi dadolin no hola lia tuir lisan no kultura Munisípiu Manatuto nian hodi fó onra no respeitu ba Saudozu Mgr. Martino da Costa Lopes.

Jornalista: Davilio Valdamir