Tribunál Suai Aplika Prizaun Preventiva Ba Membru SNI Na’in-Tolu ho UPF Na’in-Ida Ne’ebé Alegada Ba Kazu Omisídiu iha Wetaba

Arguidu sira ne'ebé alegadu ba kazu omisídiu iha Aldeia Wetaba ne'ebé halakon Terezinha Cardoso nia vida.

Díli, 03 Setembru 2026 (RAFA)- Tribunál Judisiál Primeira Instánsia Suai (TJPIS) liuhosi audénsia julgamentu  primeira introgatóriu, Kinta-ne’e, hatun despaxu ikus hodi aplika medida koasaun prizaun preventiva ba arguidu na’in-haat  ne’ebé alegada envolve iha kazu omisídiu ne’ebé halakon Terezinha Cardoso nia vida iha Aldeia Wetaba, Suku, Beiseuc Postu Administrativu Tilomar, Munisípiu Covalima, iha fulan-Juñu  tinan 2026.

Arguidu na’in-haat ne’e, na’in-tolu membru Servisu Nasionál Intelijénsia (SNI) no  na’in-ida seluk hanesan membru Unidade Patrullamentu Fronteira (UPF).

Portavós Komandu Jerál Polísia Nasionál Timor-Leste (PNTL), Superintendente-Xefe Polísia João Belo dos Reis, liuhosi konferensia ba imprensa, iha Komandu Jerál PNTL, informa katak  Tribunál Judisiál Primeira Instánsia Suai (TJPIS) liu husi despaisu ikus ba Julgamentu Primeiru Interogatoriu deside  Prizaun Preventiva (PP) ba arguidu na’in-haat ne’ebé tuir entendimentu Tribunál nian katak  iha indísius forte ba kazu halakon vitíma Terezinha Cardoso nia vida.

To’o oras ne’e matebian Terezinha Cardoso nia restus mortais seidauk hetan. Nune’e, komunidade no família sira deskonfia suspeitu sira hakoi subar mate-isin.

“Prosesu julgamentu Primeira Interogatoriu la’o hela iha Tribunál Judisiál Primeira Instánsia Suai (TJPIS), ami hetan kontaktu husi ami nia pesoal sira koloka iha ne’ebá, investigadór sira akompaña hela kazu ne’e katak sira na’in-haat ne’ebé DSIK detein iha loron hirak liubá agora hetan ona desizaun husi Tribunál bá Primeira Interogatóriu (PI) katak sira hotu tama Prizaun Preventiva (PP),” Superintendente-Xefe Polísia João Belo dos Reis informa.

Superintendente-Xefe Polísia ne’e esplika, autoridade sei kontinua halo investigasaun kle’an liu tan hodi buka paradeiru mate isin vítima ne’ebé to’o agora sei lakon hela.

Superintendente-Xefe João Belo hateten, nia lakohi hakat liu desizaun Tribunál. Prosesu disiplinár no prosesu krime ba membru PNTL ne’ebé envolve iha kazu ne’e la’o ona no asaun ne’ebé membru PNTL ne´e komete responsabilidade individu, la’ós instituisaun tomak.

Prosesu disiplinár la’o krime mós la’o ona oinsá mak determina membru PNTL ne’ebé mak involve iha aksaun ne’e. Nia parte lakohi temi instituisaun asaun sira halo ne’e individu, ne’e individu responsabilidade bá nia hahalok ne’ebé nia halo.

Kazu ne’e hahú bainhira DSIK kumpri mandadu detensaun husi TJPIS iha loron 31 fulan-Agostu 2026 hodi detein arguidu na’in-haat iha sela detensaun PNTL Komandu Munisípiu Covalima antes aprezenta ba Primeira Interogatóriu.

Iha audénsia primeira interogatóriu, Ministériu Públiku ne’ebé reprezenta husi Prokurador Renato Bere Nahac alega arguidu na’in-haat  komete krime omesídiu simples ne’ebé previstu iha  Artigu 138 Kódigu Penál Timor-Leste. Ho nune’e,  Prokuradór Renato Bere Nahac solisita ba Tribunál atu aplika  medida koasaun prizaun preventiva hodi permite prosesu investigasuan kontinua.

Defonsór Públiku, Domingos dos Santos ne’ebé fó asisténsia legál ba arguidu na’in-haat ne’e husu atu Tribunál aplika medida  koasaun Termu Identidade Rezidénsia (TIR).

Jornalista: Juvinal Cabral / João Carlos