FRETILIN Ejize Governu Nia Seriedade Ba Kombate Krimé Transnasionál iha Timor-Leste

Membru PN husi Bankada FRETILIN, David Dias Ximenes Mandati. Imajen/Rafa.tl

Díli, 03 Setembru  2026 (RAFA)- Membru  Bankada Frente Revolucionária de Timor-Leste Independente (FRETELIN), David Dias Ximenes Mandati hatete FRETILIN iha dever no obrigasaun atu kestiona krimé transnasionál no ejize governu nia seriedade atu kombate tanba ida-ne´e lori impaktu negativu ba dezenvolvimentu no moris sosiedade tomak nian.

Deputadu David Mandati Ximenes hatoo preokupasaun ne´e ba Jornalista sira iha Parlamentu Nasionál, Kinta-ne’e, liga ho atividade ilísitu Scam Call Centre ne’ebé iha tinan ida ikus ne´e nia númeru aumenta no  envolve sidadaun estranjeiru liu ema 483 husi nasaun sira hanesan Xina, Indonézia, Kambodia, Republika Suriname no mós país seluk ne´ebé uza Timor-Leste hanesan sentru ba atividade ilísitu sira.

“Realmente buat ida krimé transnasionál ne’e la’ós ona FRETILIN nia problema de’it, partidu FRETILIN realamente iha devér moral para husu tuir buat sira ne’e, tanba ida ne’ebé hamosu dehan katak Timor ne’e direitu ukun rasik aan uluk FRETILIN duni. Agora kuandu ukun rasik aan mak mosu fali irregularidade sira ne’e nia iha direitu no obrigasaun para kestiona,” hatete Deputadu David Dias Ximenes Mandati.

Reprezentante Povu ne’e kestiona mós tanba saida mak autór  sira ne’ebé involve aan iha kazu krimé transnasionál ne’e bele tama iha Timor-Leste  ho fasilidade sira,  no autór sira balu  involve direitamente iha kazu krimé transnasionál seidauk hasoru justisa.

Nia adianta krimé transnasionál, ne’e krimé públiku nune’e la presiza hein keixa, maibé buka prová sesé mak bele involve iha krimé transnasionál ne’e buka veresidade prová hodi ba hasoru justisa tuir lei ne’ebé mak iha.

Antes ne’e, iha loron 29 fulan-Agostu, liuhosi reuniaun membru Komité Sentral FRETILIN (CCF), halo diskusaun kle’an no nota ho preokupasaun boot katak Timor-Leste monu ona iha pegada krimi organizadu internasionál no tamba n’e presiza atu harii konsiénsia komun ida kona-bá importansia no urjensia atu salva Timor-Leste hosi situasaun halo State Capture ka domina Estadu Timor-Leste nia orgaun soberania sira.

Jornalista : Zita Menezes