Monseñor Martinho da Costa Lopes Mak Halo Desizaun Igreja Katólika Apoiu Rezisténsia

Restus mortais restus mortais preladus Katóliku na’in-tolu; Dom Jaime Garcia Goulart, Dom José Joaquim Ribeiro ho Monseñor Martinho da Costa Lopes to'o iha Timor-Leste, Tersa 01 Setembru 2026.

Díli, 02 Setembru 2026 (RAFA)- Prezidente Repúblika, José Ramos-Horta, konfirma katak Monseñor Martinho da Costa Lopes mak halo desizaun Igreja Katólika tama iha apoiu rezisténsia ba Timor-Leste nia indepedénsia.

Prezidente Repúblika hato’o deklarasaun ne’e hodi hanoin fali ho saudade no respeitu ba Monseñor Martinho da Costa Lopes, Bispu Dioseze Díli ne’ebé sai figura importante iha luta libertasaun nasionál, no ema dahuluk ne’ebé foti desizaun klaru hodi Igreja tama iha apoiu ba rezisténsia.

Xefe Estadu esplika, preladus restus mortais na’in tolu, liu-liu Dom Martinho da Costa Lopes mak fila mai nia rain ne’ebé independente livre no nia sai husi Timor-Leste 1991 antes Masakre Santa Cruz.

“Ema ida ne’ebé ha’u hadomi no respeitu, tanba uluk tempu Portugés ami na’in-rua kolabora iha Jornal Diocese Dili nian, ha’u koñese nia di’ak, ema ida di’ak tebe-tebes. Nia mak hahú ho maun Xanana relasaun rezisténsia ho Igreja, sira hasoru malu iha Mehara, momentu ne’ebá mak Dom Martinho halo desizaun Igreja tenke tane luta,” Prezidente Repúblika, José Ramos-Horta haktuir ba jornalista iha Palsiu Prezidensiál, Kuarta ne’e.

Resutus mortais preladus Katóliku na’in tolu; Dom Jaime Garcia Goulart, Dom José Joaquim Ribeiro ho Monseñor Martinho da Costa Lopes to’o iha Timor-Leste, iha Tersa  01 fulan-Setembru ne’e no simu direita husi Prezidente Repúblika José Ramos-Horta, Bispu sira Konferénsia Episkopál Timorense, membru Governu, Parlamentu Nasionál, autoridade sira sivil no militár, relijiozu sira hamutuk ho povu no sarani fiar nain sira iha Aeroportu Internasionál Prezidente Nicolau Lobato no translada ba kampal Tasi-Tolu hodi hasa’e misa agradesimentu molok Monseñor Martinho da Costa Lopes vizita ba Laleia no sei fila-fali mai haloot ho preladus Katóliku sira seluk, Dom José Joaquim Ribeiro, Dom Jaime Garcia Goulart no Dom Alberto Ricardo da Silva iha Igreja Katedral Díli.

Jornalista: Cristina Ximenes