Ministru Interiór Garante Laiha Partidarizmu no Familiarizmu Re-Teste Kadete Foun PNTL

Ministru Interiór (MI) Francisco da Costa Guterres.

Díli, 02 Setembru 2026 (RAFA)- Ministru Interiór (MI) Francisco da Costa Guterres, garante katak iha prosesu sira re-teste ba kadete foun Polísia Nasionál Timor-Leste (PNTL) sei la hamosu partidarizasaun no laiha sistema familiarista tanba Polísia la koñese partidu no servi deit tuir Lei no Orden.

“Ha’u labele ko’alia barak ona tanba agora ne’e iha hela Komandu Jerál PNTL, entrega ona iha ekipa juri, komandante mós sei la ko’alia ne’e orsida juri mak sei esplika bá imi, mekanizmu saida no bainhira mak sira sei halo,” Ministru Francisco da Costa Guterres  haktuir bá jornalista sira iha Palásiu Governu, Kuarta-ne’e.

Ministru Interiór esplika, kona-bá desizaun bá kadete rihun 12 resin atu halo re-teste ne’e komisaun juri rekrutamentu PNTL mak deside ona.

“Relatoriu ne’ebé mak sira fó ha’u ne’e, oras ne’e sira diskuti hela kona-bá fatin, sira hamutuk ho Komisaun Funsaun Públika, hamutuk ho Ministériu Edukasaun ho mós Polísia Austrália ho Polísia Portugál sira buka hela mekanizmu atu teste ne’e iha fatin ne’ebé de’it,” Governante ne´e hateten.

Nia hateten ema barak demais labele halo teste iha Díli de’I,t tenke halo iha munisípiu balun ezemplu iha Baucau no fatin ne’ebé iha kondisaun minimu para bele uza komputadór hodi nune’e ema hotu-hotu bele tuir teste dala ida.

Nia esklarese katak Partidu nunka aprezenta ema ruma, Polísia ne’e la koñese partidu, polísia ne’e halo loos nia louva, halo sala nia kaer mak ne’e ona. Tamba ne´e, garantia no fó fiar tomak ba Polísia, husu hotu-hotu tenke fó fiar ba Polísia  sira bele halo, maske iha buat balun sala maibé iha ona  investigasaun sei halo investiga hela nia prosesu.

Ministru Interiór ne’e subliña, agora sira ne’ebé mak fó teste ne’e la iha envolvimentu iha prosesu anteriór, ne’ebé fiar katak sira ne’e bele halo ho independente no parsial tanba sira iha esperiénsia ne’ebé uluk sira balun envolve tiha ona iha prosesu rekrutamentu uluk liu ne’e, ne’ebé sira iha esperiénsia oituan sira sei halo buat di’ak atu garante imajen instituisaun Estadu liu-liu PNTL nian.

Jornalista: Juvinal Cabral dos Santos