Investór husi Índia Interese Explora Oportunidade Investimentu iha Sétor Lima iha Timor-Leste

Investór na'in-10 husi Índia hasoru malu ho PR Ramos-Horta iha Palásiu Prezidensiál, Kuarta 02 Setembru 2026.

Díli, 02 Setembru 2026 (RAFA)- Investór hamutuk na’in-10 husi Índia iha interese hakarak explora oportunidade investimentu iha sétor lima iha Timor-Leste, hanesan agrikultura, saúde, edukasaun, infraestrutura, turizmu no seluk tan.

Embaixadór Timor-Leste ba Índia, Carlito Nunes, hafoin lori investór sira-ne’e hasoru malu ho Prezidente Repúblika, José Ramos-Horta iha Palásiu Prezidensiál, Kuarta-ne’e, hateten delegasaun investór husi Índia ne’e to’o iha Timor-Leste, Tersa  01 Setembru 2026, ho  objetivu atu esplora oportunidade  investimentu iha Timor-Leste.

Emprezariu Índia sira-ne’e sei hasoru malu mós ho emprezáriu nasionál sira iha Kámara Komérsiu Indústria Timor-Leste (CCI-TL, sigla portuges)), TrandeInvest, sei hasoru Primeiru-Ministru, Ministru Agrikultura Floresta Peskas no Pekuariu, Ministra Saúde no mós minsiteriu selu-seluk tan.

“Objetivu sira ne’e atu explora oportunidade oinsá bele investe ka haré oportunidade ne’ebé iha, liu-liu ekosistema ba investimentu ne’ebé Timor-Leste iha,” Embaixadór Carlito Nunes hateten.

Diplomata Timoroan ne´e informa, iha semana ida ne’e sei asina mós akordu kooperasaun ida ho Starking Medikal Center ne’ebé sira sei oferese mós doutor espesialista mai ospitál privadu, ne’e.

Prezidente Repúblika, José Ramos-Horta fó bemvindu tanba interese mai investe, no liu-liu relasaun ho Timor-Leste nia prezidensia ba ASEAN iha 2029 ne’ebé oportunidade iha no sira vontade atu explora oportunidade bele investe iha Timor-Leste ne´e sei lori pasu pozitivu ba oin.

Jornalista: Cristina Ximenes