Timoroan Hotu Tenke Banati Tuir Preladus Katóliku Na’in-haat Nia Sasin Moris Atu Hametin no Haburas Kreda no Nasaun

Bispu Dioseze Maliana, Dom Norberto do Amaral.

Díli, 01 Setembru 2026 (RAFA)- Bispu Dioseze Maliana, Dom Norberto do Amaral, iha missa agradesimentu ba preladus Katóliku sira iha Tasi-Tolu, Tersa-ne’e, husu atu Timoroan hotu tenke banati tuir Preladus Katóliku Na’in-haat, Dom Jaime Garcia Goulart, Dom José Joaquim Ribeiro, Monseñor Martinho da Costa Lopes ho Dom Alberto Ricardo, sira-nia sasin moris atu hametin no haburas kreda no nasaun husi jerasaun ba jerasaun.

Dom Norberto do Amaral hateten preladus Katóliku na’in-haat ne’e hanesan ezemplu Fiar nian, hodi Fiel iha sira nia missaun no kontinua halakan esperansa iha Timoroan sira nia neon.

Bispu Dioseze Maliana Dom Norberto do Amaral, esplika katak leitura iha misa abertura fó hanoin fali ba sarani sira, Jesus ne’ebé haklaken no halo hakmanek ba ema hotu.

“Jesus halo milagre ne’ebé halo ema hotu hakfodak, duni sai diabu husi ema ida nia laran, naran Jesus nian mak hodi haklaken ba ema hotu, muda Jesus nia naran sai bá boot, bibi atan sira ne’e mós Jesus hodi tuir nia ain fatin sira bá haklaken no bá hato’o,” hatete Bispu Dioseze Maliana Dom Norberto do Amaral iha omilia.

Bispu Maliana ne’e hatutan katak preladus sira husik sira nia rai hodi mai Timor tanba missaun. Ema hotu hatene Jesus tanba servisu misionáriu sira nian. Ema laran di’ak sei moris nafatin, ema ne’ebé hakman sira sei simu ho kaman nafatin. Sira husik sira nia rai hodi mai rai Timor, mai tanba de’it Na’in Jesus nia naran sai boot no morin ona iha Timor. Ema hotu-hotu hatene ona Jesus ne’e tan de’it Misionariu sira nia servisu, mak fó hotu ba Maromak.

Reestus mortais sira deskansa ona iha leet povu nian ho hakmatek. Ne’e sai sinál katak sira hamutuk nafatin ho Timor-Leste.

“Tanba ita lori de’it bá lalehan buat ne’ebé ita fahe bá ema seluk sira fó hotu, agora sira deskansa hakmatek. Agora sira iha ona ita nia leet fizikamente sira nia restus mortais ne’ebé iha ona ita nia leet ita simu ho laran haksolok, sira sai duni rai ida-ne’e nia moral ne’ebé harii, hametin, haburas lori ida-ne’e bá oin nafatin bá jerasaun sira ne’ebé tuir mai,” dehan Dom Norberto.

Dom Norberto afiNorbmos iha nia omilia katak restus mortais ne’ebé iha ona povu no sarani sira leet bele sai nu’udar sinál ida katak sira hamutuk ho povu ne’e. Tamba ne’e husu ba sarani sira atu husu  deskupa ba restus mortais preladus Amu Bispo na’in-haat, sala sira ne’ebé povu halo ba sira iha tempu liubá.

“Ne’e duni hodi tuku tur ba Maromak laran luak, ita agradese ba biban boot ida-ne’e, hodi hamriik iha sira nia oin, sira nia restus mortais sira ita husu deskulpa ba sira, ba ita nia sala sira ne’ebé halo ona bá sira. Ha’u husu boot ba sira iha leten aas bá ita ita ne’ebé sei la’o iha mundu ida-ne’e, mai mundu tomak no bá Povu Timor-Leste ne’ebé sira hadomi no serbí ho neon ho laran,” nia afirma.

Iha fatin hanesan, Arsebispu Arkidioseze Metropolitana Díli Dom Virgílio Cardeal do Carmo da Silva, SDB agradese ba sarani no Povu Timor-Leste ne’ebé partisipa másimu iha serimónia abertura, agradese ba Governu, entidade estranjeiru, grupu no individu sira ne’ebé fó apoiu no esforsu hodi lori fila restus mortais preladus na’in-tolu husi Portugál.

“Hakarak agradese bá ita hotu ne’ebé ohin iha ne’e komunidade, sarani hotu-hotu ne’ebé la’ós husi dioseze ida de’it, maibé ita hotu ne’ebé ohin no durante hatan ba konvite ne’ebé komisaun fó sai no ohin ita hotu hola parte kedas ona iha akompañamentu kampu aviasaun mai to’o iha ne’e, hakarak hato’o agradese ba ema hotu-hotu ninia prezensa,” hatete Dom Virgílio Cardeal do Carmo da Silva, SDB.

Cardeal ne’e konvida sarani sira atu akompaña nafatin ajenda husi komisaun organizadora, liuliu transladasaun ba Munisípiu Manatutu no Fatumeta, no partisipa másimu iha serimónia funebre.

Husu mós sarani sira atu mantein silénsiu no respeitu bainhira halo orasaun no omenajen ba restus mortais preladus Amu Bispu na’in-haat iha Altar Santu Tasi-Tolu durante loron hirak ne’e.

Fó hanoin katak, Dom Jaime Garcia Goulart, Bispu Dili (1941–1967), Dom José Joaquim Ribeiro, Bispu Dili (1967–1977), Monseñor Martinho da Costa Lopes- Administrador Apostóliku Dioseze Dili (1978-1983), Dom Alberto Ricardo da Silva, Bispo Diocese Dili (2004-2015).

 Jornalista: Juvinal Cabral dos Santos / Fidelino de Araújo