Iha Tasi-Tolu, Sarani Rihun Simu ho Orgullu Restus Mortais Preladus Katóliku Na’in-tolu

Sarani sira simu Restus Mortais Preladus Katóliku na’in-tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes hamutuk ho Dom Alberto Ricardo iha Tasi-Tolu, Tersa 01 Setembru 2026.

Díli, 01 Setembru 2026 (RAFA)- Restus Mortais Preladus Katóliku na’in-tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes hamutuk ho Dom Alberto Ricardo iha ona Tasi-Tolu. Sarani no estudante rihun resin simu iha fatin serimónia ho orgullu, haksolok, respeitu, domin no orasaun.

Observasaun  RAFA  nian hatudu katak, restus mortais ne’ebé lori husi Portugál mai Timor-Leste simu uluk iha Aeroportu Internasionál Prezidente Nicolau Lobato, Comoro, to’o iha entrada altar Tasi-Tolu simu husi Arsebispu Arkediosese Metropolitana Díli, Dom Virgílio Cardeal do Carmo da Silva, SDB hamutuk Bispu Dioseze Baucau Dom Leandro Maria Alves no Bispu Dioseze Maliana Dom Norberto  do Amaral ho parada husi ekipa seguransa Igreja Katólika no FALINTIL-Forsa Defeza Timor-Leste (F-FDTL). Aleinde simu mós ho formatura husi Lia-Na’in sira no grupu tebe hafoin proseisaun lori ba iha altar.

Hafoin ne’e, restus mortais tolu ne’e lori hamutuk ba Dom Alberto Ricardo da Silva ne’ebé tau uluk  iha Altar Sagrada, Tasi-Tolu, Díli.

Durante translada restus mortais preladus Amu Bispu nian akompaña husi seguransa Polísia Nasional Timor-Leste (PNTL), F-FDTL no Polisia Militár (PM) inklui seguransa husi grupu kategoriais igreja Katólika nian asegura to’o iha área serimónia.

Iha ambiente solene, sarani husi labarik, joven, ferik no katuas, kaer tersu, kanta no halo orasaun bainhira  lori restus mortais preladus Amu Bispo nain-tolu ne’e liu iha sira nia oin.

Maski loron manas, maibé sarani sira kontinua hein ho pasiénsia. Aleinde sarani sira, akólitus, grupu kategoriais no estrutura Igreja Katólika husi Dioseze Baucau, Maliana no Díli mós marka prezensa iha serimónia ne’e.

Serimónia simu restus mortais ne’e partisipa mós husi,  Prezidente Tribunál Rekursu Afonso Carmona, Vise-Primeiru-Ministru no Ministru Koordenadór Asuntu Sosiál, no Ministru Dezenvolvimentu Rurál no Habitasaun, Mariano Assanami Sabino inklui membru Governu sira, Eis Primeiru Primeiru Ministru Taur Matan Ruak, Deputadu sira iha Parlamentu Nasionál, autoridade lokál sira no mos Padre, Madre husi parókia oioin.

Iha abertura kontinua kedas  selebrasaun missa eukaristia, no preside husi Bispo Diosese Maliana, Dom Norberto do Amaral.

Tuir ajenda ne’ebé mak komisaun organizadora fó sai depois remata missa sei iha  vizita jerál atu grupu sarani sira troka malu hala’o orasaun iha altar durante loron hirak tuir mai.

Tuir ajenda, iha loron Kinta, 03/09/2026, restus mortais Monsenhor Martinho da Costa Lopes sei lori ba Munisípiu Manatuto hodi fó oportunidade ba família no sarani sira iha ne’ebá atu fó omenajen ikus.

Restus mortais preladus Amu Bispu na’in-tolu ne’e fila mai Timor-Leste nu’udar sinál respeitu no rekoñesimentu ba sira nia luta no sakrifísiu ba povu no Igreja iha tempu luta ba ukun an.

Entertantu, kona-ba seguransa situasaun kontroladu no buat hotu lao diak tamba iha vijilánsia másimu husi PNTL no F-FDTL iha dalan sira no área sira ne’ebé Komandu PNTL koloka membru sira ba.

Jornalista: Juvinal Cabral dos Santos / Fidelino de Araujo