Timoroan Haksolok no Orgullu Simu Restus Mortais Preladus Katóliku Na’in-Tolu iha Aeroportu Comoro

Timoroan sira ho ksolok simu restus mortais Preladus Katóliku nain-tolu; Dom Jaime Garcia Goulart, Dom José Joaquim Ribeiro ho Monseñor Martinho da Costa Lopes, iha Aeroportu Internasionál Prezidente Nicolau Lobato, Tersa 1 Setembru 2026.

Díli, 1 Setembru 2026 (RAFA) – Sarani Katóliku sira ho ksolok no orgullu simu restus mortais Preladus Katóliku nain-tolu; Dom Jaime Garcia Goulart, Dom José Joaquim Ribeiro ho Monseñor Martinho da Costa Lopes, ne’ebé lori fila mai Timor-Leste husi Portugal.

Reprezentante sarani Katóliku husi parokia Maubisse, Ainaro, Paulo Doutel Sarmento, hateten katak kontente no orgullu  tanba preladus na’in-tolu ne’e sira-nia servisu no dedikasaun ba Timor-Leste ne’e importante tebes.

“Nu’udar sarani katóliku, ami sente orgullu no kontente tebes, tanba kleur ona sira na’in-tolu ba hala’o misaun misionariu iha rai seluk hodi serbí Maromak nia povu,” hatete Paulo Doutel, iha Aeroporto Internasionál Prezidenti Nicolau Lobato, Díli, Tersa-ne’e.

Iha fatin hanesan, reprezentante sarani husi parokia Balide, Tomas Oliveira, konsidera preladus na’in-tolu ne’e nu’udar ema ne’ebé kontinua fó hanorin ba sarani Katóliku sira oinsá sarani sira atu moris tuir Jesus Nia evengelu.

“Sira na’in-tolu hanorin hela evanjellu ba sarani Katóliku sira no hatudu nafatin dalan ba ita-nia sarani sira atu tuir Kristu nia forma. Ita hotu Maromak Nia povu, no ita hotu orgullu tanba governu lori fila sira nia urna mai ho dignidade,” Tomas Oliveira hateten.

Tomas hatutan katak sira-nia misionariu iha rai seluk sai parte importante husi istória Igreja Katóliku iha nasaun ida-ne’e.

“Sira sai misionáriu iha ema-nia rai no ikusmai sira mai hamutuk fali ho Timor oan sira iha ne’e, atu hametin liután ita-nia fiar ba Maromak,” nia esplika.

Tomas mós konsidera preparasaun Governu Timor-Leste nian atu simu restus mortais preladus nain-tolu ne’e merese ona, tanba fó onra ba kontribuisaun sira-nian ba Igreja no povu Timor-Leste.

Sarani Katóliku husi Paróquia Becora, Aureliano de Araújo, mós hato’o sentimentu orgullu tanba restus mortais Bispu nain-tolu agora fila fali mai Timor-Leste.

“Nu’udar sarani Katóliku, ami sente orgullu tanba Bispu nain-tolu nia urna mai fali ona Timor. Sira-nia prezensa no servisu sei nafatin sai inspirasaun ba ita, liuliu atu hametin ita-nia fiar,” hatete Aureliano de Araújo.

Reprezentante sarani husi parokia Dare, Filomena Lobato, informa amu Bispo nain tolu  nee mate iha ema nia rain foin mak Governu sira esforsu hodi lori mai Timor-Leste.

Nia esplika, Banhira restu mortais too iha nee sarani sira sei ba reza nunee bele hetan graca husi Maromak.

“Banhira restu mortais sira ne’e  tau iha nee hanesan fatin ida ba turizmu relizioju ba timor oan sira nune’e  fanun nafatin timor oan sira  hodi bele mai reza nafatin”, tenik nia.

Iha fatin hanesan sarani husi Paroquia Sagrada Coração de Jesus Becora, Jaime Jeronimo hateten hanesan sarani sente kontente bele mai too iha aeroportu hodi simu restu mortais preladu husi portugal.

“Ha’u mai hanesan sarani ema ida la obriga ha’u, maibé tuir ha’u nia konsiensia katak ha’u nuudar ema katoliku ha’u iha dever no obrigasaun atu mai aeroportu hodi simu restu mortais amo lulik nian husi portugal,” Jaime Jeronimo haktuir.

Nia konsidera bispo dom martinho hanesan luta ba Timor Leste nia ukun rasik an iha tempu uluk nian.

“Governu nia konsiderasaun diak tebes tanba amu lulik nain tolu mate iha ema nia rain,maibe Governu esforsu too lori restu mortais mai ita nia rain,tanba nee misa boot iha tasi tolu hanesan sarani katolika sei partisipa masimu,” tenik nia.

Tuir observasaun husi RAFA katak hahú husi Ponte CPLP  sarani sira komesa lao ain balun ho transporte públiku ba aeroportu Internasional Prezidente Nicolau Lobato hodi simu urna amu bispu na’in-tolu ne’ebé  oras tan to’o Timor Leste.

Tuir dalan estudante sira hamrik ho entuazismu hodi hakat ba areador aeroprtu  husi ne’e laos estudante deit, maibé ferik no katuas, Madre no padre no sarani hotu ho laran kontente tebes simu restu mortais preladu neebe  oras balun too iha Timor-Leste.

 Jornalista: Cesarina de Carvalho/ Mário Fili