PR Timor-Leste Hato’o Solidariedade ho Nepal Hafoin Inundasaun no Rai-Monu

Kondisaun iha Nepal hafoin dezastre naturál. Imajen/AP

Díli, 1 Setembru 2026 (RAFA)–Prezidente Repúblika no Laureadu Nobel ba Paz, José Ramos-Horta, hato’o sentidu kondolénsia kle’an ba Prezidente, Governu, no povu Nepal hafoin rai-monu no inundasaun sira ne’ebé foin lalais ne’e akontese iha parte oioin nasaun nian.

Iha karta ofisiál ida ho data 31 fulan-Agostu 2026 ne’ebé hato’o ba Sua Exelénsia Sr. Ramchandra Paudel, Prezidente Nepal nian, Prezidente José Ramos-Horta espresa tristeza kle’an ba trájiku lakon vida, númeru aas husi ema sira ne’ebé maka lakon, no destruisaun jeneralizada ba komunidade, uma, no infraestrutura krítiku sira.

“Ha’u hakarak hato’o ha’u nia sentidu kondolénsia kle’an ba Sua Exelénsia, Governu no Povu Nepal nian, liuliu ba família vítima sira ne’ebé afetadu husi rai-monu no inundasaun sira ne’ebé foin lalais ne’e akontese iha fatin oioin iha nasaun Nepal. Ami simu ho laran-susar tebes notísia kona-bá lakon vida, númeru aas husi ema sira ne’ebé lakon, no estragu sira ba komunidade, uma, estrada no infraestrutura sira seluk. Iha tempu sofrimentu no susar boot ida-ne’e, ha’u hakarak hato’o ba família sira ne’ebé lakon ema sira ne’ebé sira hadomi, ami nia solidariedade no kompaixaun sinseru, no mós ami nia dezeju ba forsa no esperansa ba komunidade sira ne’ebé afetadu no ba ekipa sira ne’ebé kontinua hala’o operasaun hodi buka, salva no ajuda,” Ramos-Horta hateten hanesan Rafa sira husi komunikadu ofisiál.

Timor-Leste espresa nia solidariedade tomak ho povu Nepal iha tempu susar ida ne’e no hein katak esforsu emerjénsia no rekuperasaun ne’ebé la’o daudaun sei ajuda salva vida, fó asisténsia ba sobrevivente sira, no harii fila fali komunidade sira ne’ebé afetadu.

Jornalista: Cristina Ximenes