Megawati Konsidera Enkontru ho Premiadu Nobel no Sientista Internasionál Sira Oportunidade Atu Rekonsilia Siénsia no Responsabilidade Polítika Ba Umanidade

Prezidente Repúblika Indonézia ba dala-lima Megawati Soekarnoputri, ho Prezidente Timor-Leste, José Ramos-Horta foto hamutuk ho laureadu Nobel ba Paz no Premiu Turin sira hafoin enkontru iha Institutu Megawati iha Jakarta, Sesta, 28 Agostu 2026. Imajen/ANTARA

Jakarta,  28 Agostu  2026 (RAFA)- Prezidente Repúblika Indonézia (RI) nian  ba da-lima, Megawati Soekarnoputri, hateten iha sorumutu ho Premiadu Nobel, sientista internasionál no premiadu Turing sira iha Institute Megawati nu’udár oportunidade importante atu rekonsilia siénsia no responsabilidade polítika ba umanidade sira.

Jornalista RAFA, Zita Menezes husi Jakarta relata katak sorumutuk ne’ebé hala’o iha Institute Megawati iha Jakarta, Sesta-ne’e,   Prezidente Partidu Partai Demokratik Indonesia Perjuangan (PDI-P), Megawati Sukarmoputri hato’o nia bemvindu no onradu ba Prezidente Repúblika José Ramos-Horta, Premiadu Nobel sira , Premiadu Turing no siéntista internasionál sira tanba bele vizita ona Institute Megawati.

Primeiru Prezidente Repúblika Indonézia Soekarto nia oan feto ne’e hatete, Institute Megawati maka fatin siénsia no fatin polítika, tau iha prátika ba umanidade, nune’e  nia parte sente orgullu no onradu tebes atu simu prezensa hosi sientista no pensadór prinsipál sira iha mundu maka oportunidade ida ne’ebé iha valór atu troka ideia sira kona-ba dezafiu barak ne’ebé maka umanidade hasoru daudauk.

Nia hatete, nu’udár Prezidente Repúblika Indonézia ba dala-lima, iha konsistentemente hala’o inisiativa sira ne’ebé relasiona ho edukasaun, domíniu siénsia bázika sira, peskiza, no inovasaun ba teknolójia.

“Ha’u haré ida-ne’e hanesan oportunidade ida atu rekonsilia siénsia ho responsabilidade polítika, liuliu ba umanidade. Ha’u espera katak ita-nia enkontru badak tebes ohin bele sai hanesan inísiu ba interkámbiu ida ne’ebé naruk liu entre sientista sira, líder polítiku sira, no sosiedade sivíl, hanesan ha’u propoin ho respeitu ba Prezidente Ramos-Horta. Se bele, ita bele hasoru malu, karik dala rua iha tinan ida, ka dala barak liu, atu fahe, hotu-hotu ba benefísiu umanidade no sivilizasaun umana rasik,” Megawati Soekarnoputri hateten.

Iha soromutu ne’e Institute Megawati prepara mós han meudia hamutuk ho Prezidente Repúblika José Ramos-Horta, Premiadu Nobel sira , Premiadu Turing no siéntista internasionál sira hodi fahe esperiénsia ba malu kona-bá asuntu politiká, teknólogia, mudansa klimitiká, edukasaun nomós asuntu importante sira seluk.  Remata