Tambling Wildlife Nature Conservation, Fatin Konservasaun Floresta Fauna no Reabilitasaun Ba Balada Fuik Sira

Tambling Wildlife Nature Conservation (TWNC) iha Sumatra-Indonézia.

Sumatra,  28 Agostu  2026 (RAFA)- Tambling Wildlife Nature Conservation (TWNC) mak fatin konservasaun floresta  fauna no reabilitasaun  animál fuik sira iha Illa Sumatra-Indonézia.

Diretór Tambling Wildlife Nature Conservation (TWNC),  Ardi Bayu Firmansyah espliká, Tambling Wildlife Nature Conservation, ne’e bai-bain bolu área konservasaun ida  iha Lampung-Sumatra.

Nune’e setór privadu Artha Graha Peduli (AGP)  kolabora ho Parké  Nasionál  Bukit Barisan Selatan  (TNBBS), hodi halo  jestaun  ba área Parké Nasionál ne’ebé  kuazé kobre ektare 50,000 no rezerva natureza mariña kuazé kobre 15,000 ektare  inklui  jere ekosistema no abitatante  hotu-hotu ne’ebé moris  iha laran.

“Ami konserva no proteje animál fuik sira iha ne’e, hanesan tigre Sumatra nian, panda Sumatra nian, elefante Sumatra nian, no londra sira. Entaun, karik iha animál sira ne’ebé kanek, hanesan tigre sira ne’ebé kanek, ka konflitu ho umanu, ami lori sira mai iha ne’e hodi halo reabilitasaun,” Diretór TWNC Ardi Bayu Firmansyah ba jornalista sira iha Parké Nasionál TWNC iha Illa Sumatra, Indonézia, Kuarta foin lalais  ne’e.

Jornalista RAFA, Elio dos Santos ne’ebé hetan oportunidade halo vizita ba Tambling Wildlife Nature Conservation  iha Sumatra-Indonézia, relata katak TWNC  sai hanesan instituisaun sentru ba reabilitasaun balada fuik sira. Tanba Tambling Wildlife Nature Conservation mak nu’udár setór privadu ne’ebé ajuda Governu oinsá  konserva no proteje  natureza no  animál fuik sira ne’e bele moris tuir sira nia fatin ho  livre.

Diretór TWNC Ardi Bayu Firmansyah hateten katak durante ne’e ekipa Tambling Wildlife Nature Conservation  sempre fó edukasaun  ba komunidade sira hodi labele estraga balada fuik sira no natureza sira ne’ebé moris iha   Tambling Wildlife Nature Conservation.

“Loos duni, balada fuik sira no ema bele moris hamutuk. Ita ida-idak iha ita-nia abitante rasik, ita labele kompara sira. Sira balada fuik, moris iha natureza fuik. Ita ema moris iha fatin ne’ebé diferente. Iha Tambling, ita bele koeziste ho sira. Ita eduka públiku katak ita tenke hamutuk proteje natureza,”tenik Diretór TWNC  Ardi Bayu Firmansyah.

Nia afirma durante ne’e TWNC servisu hamutuk ho Governu Indonézia liuliu Ministériu Floresta hodi tau matan no proteje  ba Tambling Wildlife Nature Conservation  TWNC.

Parte seluk Lia-na’in toko adat sira hamutuk ho instituisaun seguransa estadu nian hanesan Tentara Nasionál Indonézia (TNI) no Polisia Repúblika Indonézia (POLRI) durante ne’e servisu hamutuk, enkoraja komunidade sira atu mutuamente proteje no prezerva área konservasaun Parke Nasionál Tambling Wildlife Nature Conservation.

Konservasaun Tambling Wildlife Nature Conservation (TWNC), lokaliza iha Illa Sumatra Indonézia, hahú nia operasaun ka halo konservasaun iha tinan 1996, ne’ebé jere  no finanseiru direita husi Fundasaun  Artha Graha Peduli AGP, na’in husi fundasaun Artha Graha Peduli AGP, mak emprezáriu susesu ida husi nasaun  Indonézia, Tomy Winata.

Antes halo konservasaun ba Tambling Wildlife Nature Conservation, fatin referé hetan estraga ilegál, tanba ne’e Fundasaun Artha Graha Peduli hahú programa konservasaun ne’e objetivu atu reabilita no proteje hametin seguransa floresta no fó protesaun ba fauna no natureza sira  inklui harimau Sumatra sira ne’ebé moris iha Illa referé.

Tinan 2007–2008 Tambling Wildlife Nature Conservation TWNC halo kooperasaun ho Governu Indonézia liuhosi akordu ho Ministériu Floresta   katak área TWNC tama iha  sistema konservasaun Parké Nasionál ka Taman Nasional Bukit Barisan Selatan (TNBBS).

2010 Parké Nasionál Tambling Wildlife Nature Conservation (TWNC), ofisialmente inagura no hetan rekoñesimentu husi Ministru Floresta Repúblika Indonézia  Zulkifli Hasan SE.MM.

Tambling Wildlife Nature Conservation (TWNC), iha floresta  hamutuk 48,153 ektare, área kostál 14,089 ektare, iha uma-kain 155, iha mós eskola husi Pre-Primaria to’o iha Pre-Sekundária iha mós Aeroportu no villa sira ne’ebé bele atende ba vizitante.  Remata