PR Ramos-Horta ho Premiadu Nobel no Premiu Turing Sira Hasoru Malu ho Megawati iha Jakarta

PR José Ramos-Horta lori Premiadu Nobel na’in-10 no Premiu Turing na’in-haat hasoru malu ho Prezidente Repúblika Indonézia ba da-lima Megawati Soekarnoputri iha Institutu Megawati iha Jakarta, Sesta 28 Agostu 2026. Imajen/Espesiál PDI-P

Jakarta, 28 Agostu 2026 (RAFA)- Prezidente Repúblika, José Ramos-Horta lori Premiadu Nobel na’in-10 no Premiu Turing na’in-haat hasoru malu ho  Prezidente Repúblika Indonézia ba da-lima Megawati Soekarnoputri iha Institutu Megawati iha Jakarta, Sesta-ne’e.

Jornalista RAFA, Zita Menezes ne’ebé akompaña enkontru ne’e husi Jakarta informa katak sorumutuk ne’e ko’alia kona-bá dezenvolvimentu siénsia no teknolojia no nia impaktu ba umanidade.

Oportunidade ne’e troka mós ideia kona-ba dezenvolvimentu sientífiku sira no asuntu atuál oioin ho prezensa premiadu Nobel no Prémiu Turing  ho sientista sira iha ida-idak nia área.

Sekretáriu Jerál PDI-P, Hastoiyanto haktuir ba jornalista sira hafoin akompaña enkontru ne’e informa katak  enkontru  ne’e hala’o iha formatu diskusaun meza redonda. Megawati, Ramos-Horta, no manan-na’in sira Prémiu Nobel no Prémiu Turing nian balun mós fahe sira nia hanoin iha fórum.

Laureadu sira Nobel no Premiu Turing sira-ne’e halo  parte ona iha delegasaun Simeira Siénsia ba Dezenvolvimentu 2026 iha Díli iha Domingu-Tersa (23-25 Agostu 2026).

Prezidente Repúblika  José Ramos-Horta lori delegasaun tomak hodi hasoru malu ho Prezidente PDI-P Megawati no xefe sira hosi ajénsia peskiza nasionál sira.

Iha fatin hanesan Diretór Ezekutivu Institutu Megawati, Hilmar Farid konfirma  katak enkontru ne’e mosu hosi hanoin sira ne’ebé fahe entre Megawati no Ramos-Horta. Tanba líder na’in-rua ne’e fiar katak siénsia no teknolojia maka krusiál hodi rezolve dezafiu oioin ne’ebé maka umanidade enfrenta ohin loron no iha futuru.

“Enkontru ne’e esensialmente hakarak halibur siénsia no trata kestaun reál sira ne’ebé mundu enfrenta. Ita iha dezenvolvimentu sientífiku no teknolójiku estraordináriu sira, maibé iha tempu hanesan, ita hasoru dezafiu umanitáriu, ambientál, ekonómiku no polítiku sira ne’ebé kompleksu ba beibeik,” Hilmar Farid hateten.

Tuir nia, enkontru ne’e la dezeña hanesan konferénsia sientífika ida ho diskusaun ketak bazeia ba dixiplina sientífika sira. Maibé,  hanesan diálogu ida hodi halibur esperiénsia no perspetiva oioin.

“Importante maka la’ós de’it halibur ema sira ho realizasaun sientífiku sira ne’ebé realizadu tebes. Saida maka ami hakarak haburas maka konversa ida entre sira, no mós ho líder polítiku sira, kona-bá oinsá koñesimentu no teknolojia bele uza hodi rezolve problema komún sira,” Hilmar konklui.

Prezidente Repúblika José Ramos-Horta to’o iha Institutu Megawati Hale’u tuku 12:15 Oras Indonézia Osidentál (WIB. sigla Indonézia) ne’ebé simu direta husi Megawati no bainaka konvidadu sira.

Puan Maharani no Prananda Prabowo, no mós Sekretáriu Jerál PDI-P Hasto Kristiyanto, akompaña Megawati hodi kumprimenta Prezidente Repúblika Ramos-Horta nia komitiva.

Bainhira sira tama iha área eventu nian,  Megawati no Ramos-Horta kaer-liman. Tuirmai sira na’in-rua la’o hamutuk ba fatin enkontru nian. Remata