Governu Kontinua Konstrui Uma Dignu 100 iha Territóriu Nasionál

CAC identifika konstrusaun UMA DIGNU unidade 25 iha Tunubibi, Bobonaro, nia implementasaun “grave” tanba enfrenta problema komleksu no risku boot ba korrupsaun. Imajen/CAC

Díli, 27 Agostu 2026 (RAFA) –  Governu kontinua  prevé orsamentu iha fundu infraestrutura iha proposta Orsamentu Jerál Estadu (OJE) 2027 hodi konstrui tan uma dignu 100  iha territóriu nasionál.

Vise-Primeiru  Ministru no Ministru Dezenvolvimentu Rural no Abitasaun Komunitária, Mariano Asanami Sabino, Kinta-ne’e, ba jornalista sira, hateten prosesu konstrusaun uma dignu ba povu kontinua la’o iha munisípiu sira. Tanba, konstrusaun uma dignu 100 tan sei implementa iha Suku Aubeon, Postu Administrativu Barique, Munisípiu Manatuto. Enkuantu iha Fatuberliu, estudu sei kontinua ba área SP2 atu bele fó kontinuidade ba projetu.

“Iha Munisípiu Ermera konstrusaun hala’o fatin rua no Ainaro mós iha fatin rua. Dadaun ne’e progresu obra iha fatin sira ne’e lao di’ak no espera remata iha tinan 2026,” Mariano Sabino hateten.

Nia informa munisípiu rua mak kompleta ona konstrusaun uma dignu no agora tama ba prosesu inaugurasaun mak Manatuto, Postu Administrativu Natarbora, inklui Munisípiu Manufahi, Postu Administrativu Fatuberliu.

“Prosesu ne’e hotu, orsamentu sei kontinua nafatin iha fatin balu ne’ebé inaugura ona. Iha parte balu ne’ebé lao tarde, hanesan iha Tunubibi. Maibé, restu sira avansa nafatin. Fundu infraestrutura mós hato’o tiha ona atu konstrui tan total uma 100 iha territóriu nasionál,” Vise-Primeiru  Ministru  Mariano Asanami Sabino hateten.

Nia hatutan projetu uma dignu anteriór konsidera hanesan projetu pilotu, no governu kontinua mantein prinsipiu “hau nia uma, hau nia moris”, ne’ebé haré uma nu’udar direitu fundamentál ba sidadaun.

Asanami Sabino haktuir públiku dala barak husu tanba saida konstrusaun uma dignu lori tempu naruk. Tanba públiku haré deit rezultadu físiku, maibé la haré prosesu no kualidade materiál ne’ebé uza.

Nia esplika katak konstrusaun uma ho kualidade presiza tempu atu garante uma ne’e bele tahan kleur no kumpri nia finalidade ba tempu naruk.

“Se iha uma dignu balu ne’ebé la kumpri regra, governu la tolera no sei hapara konstrusaun ne’e,” Vise-Primeiru  Ministru Mariano Asanami   Sabino afirma.

Ministru Desenvolvimentu Rural no Abitasaun Komunitária informa katak governu sei kontinua propoin orsamentu ba tinan 2027 atu hala’o estudu kle’an kona-ba modelu apartamentu ba joven sira no komunidade.

Maiske,  Timor-Leste hanesan nasaun ki’ik, tanba ne’e presiza planeamentu no ordenamentu ne’ebé diak atu prevene populasaun sofre eviksaun.

“Ita tau ona orsamentu iha planu atu halo estudu kle’an liu tan ba apartamentu to’o iha Hera no Metinaro. Prosesu agora lao hela iha fase dezenhu, no mos bele kontinua ba uma komunidade,”  Asanami Mariano Asanami afirma.

Tuir nia, uma komunidade sei integra ho dezenvolvimentu ekonómiku, tanba benefisiáriu sira sei selu uma kompletu. Maibé, família ne’ebé hela iha uma ne’e presiza iha rendimentu to’o US$500 kada fulan atu bele halo pagamentu.

Ba família sira ne’ebé seidauk atinji rendimentu nia dehan presiza servisu hamutuk ho governu atu hasa’e sira nia rendimentu.

Nia subliña objetivu prinsipál husi konstrusaun uma dignu atu hamenus númeru família sira ne’ebé moris iha kondisaun pobreza abitasionál iha Timor-Leste.

Jornalista : Remigia Locatelli