Kompañia Santos Sei Diskute ho MPRM Kona-bá Kontinuasaun Projetu Bayu-Undan

Imajen/MPRM

Díli, 27 Agostu 2026 (RAFA) — Kompañia Santos hosi Austrália, haruka ona korrespondénsia  mai Governu Timor-Leste liuhosi Ministériu Petróleu no Rekursu Minerais (MPRM) atu diskute kona-bá posibilidade kontinuidade produsaun iha kampu Bayu-Undan iha futuru.

Ministru Petróleu no Rekursu Minerais, Francisco da Costa Monteiro, konfirma nia simu ona korrespondénsia pelo menus dala-rua hosi Kompañia Santos, ne’ebé konfirma interese kompañia nian atu kontinua produsaun iha kampu Bayu-Undan no uza fasilidade ne’ebá ba produsaun no prosesamentu kampu petrolíferu sira ne’ebé besik.

“Ha’u simu ona korrespondénsia pelo menus dala rua hosi Kompañia Santos, konfirma katak sira hakarak no iha interese atu kontinua produs iha kampu Bayu-Undan, inklui atu uza fasilidade ne’e ba kontinuidade produsaun no mós bele halibur no prosesu produsaun hosi kampu sira ne’ebé besik iha ne’ebá,” Ministru Francisco da Costa Monteiro informa hafoin partisipa reuniaun Planu Prioridade Governu (PPG14) iha Díli, Kinta-ne’e.

Ministru Francisco da Costa Monteiro  hatutan katak entre kampu sira ne’ebé besik Bayu-Undan mak Chuditch, ne’ebé bele konsidera ba utilizasaun iha projetu Carbon Capture and Storage (CCS). Nune’e mós iha kampu petrolíferu seluk ne’ebé bele sai parte hosi solusaun ba kontinuidade produsaun Bayu-Undan iha futuru.

“Aban, ezekutivu sira hosi Santos sei mai iha ne’e. Ohin, ami diskute kona-bá orsamentu, tanba ne’e ami sei hasoru sira tan aban atu konfirma katak iha duni preokupasaun kona-bá kontinuidade produsaun. Maibé, agora ami kontinua halo esforsu hamutuk ho Santos atu bele halo investimentu hodi kontinua produsaun iha futuru,” Ministru Petróleu no Rekursu Minerais ne’e esplika.

Tuir nia, sei iha kampu petrolíferu balu ne’ebé bele suporta kontinuidade produsaun.  Nune’e, iha futuru, Timor GAP E.P. no kompańia Santos sei bele identifika kampu sira ne’ebé iha potensia no relata ba Autoridade Nasionál Petróleu (ANP), bazeia ba mapa no dadus tékniku kona-bá rezerva sira ne’ebé sei eziste, maski volume produsaun sira menus ona kompara ho tempu uluk.

Ministru Francisco Monteiro mós hateten katak kampu sira hanesan Chuditch, Inpex no Kelp Deep bele sai entre opsaun ne’ebé konsidera atu aumenta produsaun petrolífera iha futuru.

Governu kontinua halo diskusaun ho parte relevante sira, inklui Kompañia Santos, atu buka opsaun ba utilizasaun infraestrutura Bayu-Undan no garante kontinuidade atividade produsaun petrolífera iha Timor-Leste.

Jornalista: Remigia Locatelli