Xanana Gusmão Alerta Ba Membru Governu Hamenus Viajen Lokál no Estranjeiru

PM Xanana Gusmão.

Díli, 27 Agostu 2026 (RAFA) – Primeiru-Ministru (PM ) Kay Rala Xanana Gusmão, alerta  ba membru Governu  atu hamenus viajen lokál no estranjeiru ne’ebé la nesesáriu.

Xefe Governu fó atensaun ne’e iha enseramentu Reuniaun Komite Revizaun Orsamentu  Politika (KROP) no Planu Programa Governu (PPG) 1 iha Ministeriu Finansas, Dili, Kinta-ne’e.

Primeiru-Ministru Xanana Gusmão  husu membru Governu atu uza no jere ho didi’ak rekursu Estadu, tanba osan públiku mak osan povu nian.

“Atu tau osan iha planeamentu didi’ak, haré ba saida mak seidauk hotu. Karik haré ba kbiit atu halo, mak ita husu tan osan,” Xanana afirma.

Xefe Governu  mós subliña katak Estadu Timor-Leste liu ona tinan 24 enfrenta dezafiu boot, no agora presiza esforsu foun atu hamenus dependénsia no hadi’a kondisaun ekonomia nasaun.

Xanana mós fó atensaun ba membru sira tenke esforsu atu dezenvolve produtu agríkola iha rai laran, ho objetivu atu hamenus dependénsia ba produtu importasaun.

Iha fatin hanesan Vise-Ministra Finansas, Regina de Jesus Sousa hato’o agradese ba liña ministerial sira ne’ebé partisipa ona iha KROP 2027 hodi halo diskusaun envolve Fundu Petrolíferu ne’ebé sai fonte importante ba sustentabilidade finanseira Timor-Leste no maioria despeza Governu nian.

“Husu ita hotu nia partisipasaun atu rona aprezentasaun sira ne’ebé tekniku sira apresenta. Dalaruma Ministeriu Finansas kritiku iha termus alokasaun no rigor iha ezekusaun, la’ós tanba la apoiu programa Governu, maibé ita hotu hatene katak fundu úniku ba despeza ne’ebé sustenta ita mak Fundu Petrolíferu,” Vise-Ministra Regina de Jesus Sousa informa.

Vise-Ministra Finansas subliña priorodade fundu petroliferu  katak, se Governu hakarak garante sustentabilidade Fundu Petrolíferu ba futuru, tenke fó atensaun ba prioridade estratéjika sira ne’ebé bele fó retornu ba nasaun.

“Dalaruma ita hakarak gasta osan ba buat oioin. Maibé, ita tenke haré ida ne’ebé sai prioridade, iha impaktu no sustentabilidade,” Governante ne’e haktuir.

Nia mós relata kona-ba preparasaun Orsamentu Jerál Estadu (OJE) 2027, Governu introdús métodu foun ne’ebé konsidera pontu prinsipál rua, mak Inisiativa Futura no Prioridade Política Governu (PPG).

Iha enseramentu diskusaun, Governu mós aborda jestaun prudente Fundu Petrolíferu, inklui PPG 14 ne’ebé liga ho garantia futuru husi kompromisu kona-bá Petróleu no Minerais, dívida no Empresa Públika Eletrisidade Timor-Leste (EDTL).

Iha parte téknika, ekipa Ministeriu Finansas aprezenta rezumu relatóriu KRO Orsamentu 2027, inklui proposta no dadus kona-ba Fundu Petrolíferu.

Tuir aprezentasaun téknika, Ministeriu Finansas aprova montante US$50,000.00 ba pedidu orsamentu 2027, ho US$25,000.00 ba konsultasaun no sosializasaun no US$25,000.00 ba modelu rendimentu petrolíferu.

Jornalista : Remigia Locatelli/ Cristina Ximenes