PNTL Seidauk Kaptura Hikas Arguidu Na’in-61 Ne’ebé La Kumpri Desizaun Tribunál Ba Kazu Scam Call Centre iha Ulmera

Portavós Polísia Nasionál Timor-Leste (PNTL), Superintendente-Xefe Polísia João Belo dos Reis.

Díli 27 Agostu 2027 (RAFA)– Polísia Nasionál Timor-Leste (PNTL)  seidauk   kaptura hikas arguidu na’in-61 ne’ebé la kumpri no halai ses husi desizaun Tribunál  ba kazu Scam Call Centre iha área Ulmera, Munisípiu Liquiça.

Arguidu sira bá Kazu Scam Call Centre Ulmera hamutuk na’in- 76, maibé na’in-rua mak konsege selu médida kausaun US$10,000.00 husi Jerente ida, no arguidu seluk selu kausaun US$2,500.00 no na’in-61 mak seidauk selu kausaun iha prazu loron 20 nia laran ne’ebé Tribunál aplika ona,  tanba ne’e altera hotu médida haat (4) ne’ebé aplika antes no hatun mandadu kapturasaun bá Polísia Nasionál Timor-Leste (PNTL)  hodi kaptura  arguidu lori ba Prizaun Prizaun Preventiva hodi kumpre desizaun judisiál no obrigasaun ne’ebé tribunál determina.

Polísia Nasional Timor-Leste (PNTL), ezekuta mandadu Kapturasaun ho NUC: 0248/26.PNSIC ba arguidu nain-74,  maibé kaptura de’it na’in-13 iha  rezidensia ne’ebé aluga iha Ulmera , enkuantu na’in-61 ne’e halai lakon.

Portavós Polísia Nasionál Timor-Leste (PNTL), Superintendente-Xefe Polísia João Belo dos Reis, hateten  bá Jornalista sira, Kinta-ne’e, katak PNTL kontinua halo kontrolu no koordenasaun ho autoridade relevante sira atu buka tuir arguidu sira iha kazu Scam Call Centre ne’ebé ses aan ka la kumpre obrigasaun ne’ebé Tribunál  despaisu ona.

Nia subliña, PNTL kontinua halo nia servisu liuhosi kontrolu no koordenasaun ho autoridade Migrasaun no Unidade Patrullamentu Fronteira (UPF), Unidade Polísia Marítima (UPM), Polísia Investigasaun Kriminál hamutuk ho Servisu Informasaun Polísia kontinua buka tuir arguidu sira ne’ebé ses aan husi fatin Scam Call Centre, ho objetivu atu aprezenta fila-fali sira ba Tribunál tuir responsabilidade legal ne’ebé iha.

“Ita halo ona mandadu husi Tribunál nian ba Kazu Scam Call Centre Ulmera nian na’in-13, ita lori ona previzun Preventiva, restu ita sei buka tuir hela,” portavós PNTL, Superintendente-Xefe Polísia João Belo dos Reis hateten.

Nia fundamenta, sidadaun estajiariu ne’ebé PNTL kaptura,  no tribunál  hatun ona despaisu hodi aplika ona médida sira, PNTL kontinua partilla informasaun bá  autoridade servisu Migrasaun katak arguidu sira ne’e Tribunál Aplika ona médida  bá  arguidu sira ne’ebé iha.

Nia subliña PNTL  komfirma  katak seidauk iha informasaun sufisiente katak  arguidu sira ne’e sira sai ona husi territóriu Timor-Leste.

“Ita buka tuir nafatin, ita hetan ona informasaun balu katak, balu  halo hela servisu iha projetu, balu servisu iha loja, ne’ebé  ita sei buka tuir sira, tuir informasaun ne’ebé mak ita hetan,  ita buka tuir sira hodi bele aprezenta , Informasaun ne’e ita bele hateten katak seidauk loos,  tanba ita seidauk iha informasaun ida katak sidadaun ida-ne’e  to’o ona nasaun ida-ne’e  to’o ona nasaun  ida ne’ebá, ita sei buka tuir hela sira” nia dehan.

Fó hanoin fali katak antes Tribunál aplika  médidia koasaun Termu Indetidade Rezidénsia aprezenta Periódidika fulan ida dala rua, médidia kausaun US$ 10,000.00 bá Jerente ida no na’in-76  medida  kauasuan US$2,500.00

Jormalista: Marcelino Tomae