PNTL Detein Sidadaun Estranjeiru Na’in-16 Ne’ebé Suspeita Rede Scam Call Centre iha Otel California

PNTL detein sidadaun estranjeiru na'in-16 ne'ebé suspeita rede scam call centre iha Otel California, Díli, Kuarta-kalan, 26 Agostu 2026.

Díli, 27 Agostu 2026 (RAFA)- Polísia Nasionál Timor-Leste (PNTL) liuhosi Diresaun Servisu Investigasaun Kriminál (DSIK) hamutuk ho Servisu Migrasaun (SM) no Diresaun Servisu Informasaun Polísia (DSIP), Kuarta-kalan, detein sidadaun estranjeiru  na’in-16 ne’ebé  suspeita envolve rede Scam Call Centre iha Otel California iha Metiaut, Díli.

Ekipa konjunta ne’ebé kompostu husi DSIK, SM no Servisu Sekreta, halo operasaun no busk aba iha Otél California  hale’u tuku 20:00 Otl  hodi asegura sidadaun estranjeiru ho nasionalidade Xina, Myanmar no Repúblika Suriname hamutuk na’in-16 kompostu husi mane n’in-15 no feto ida ne’ebé suspeita rede jogu Scam Call Centre.

Iha observasaun RAFA iha nian iha lokal krime nota katak autoridade sira asegura mós prova ne’ebé iha indisiu ba fasilita atividade scam call centre ne’e mak aparelu internet Starlink unidade haat ne’ebé sira instala iha otél laran, telfone hamutuk 25  inklui karreta ida no sasán sira seluk ne’ebé iha relasaun ba atividade ilisitu ne’e.

Durante buska no apreensaun ne’e autoridade seguransa sira identifika sidadaun estranjeiru na’in-neen mak iha pasaporte, no  nain-10 pasaporte la iha liman.

Traballadór ida iha Otel California ne’ebé husu atu labele públika nia identidade informa katak, sidadaun estranjeiru sira ne’e  arenda kada fulan ba espasu ne’ebé deskonfia  utiliza hodi halo atividade scam call centre ne’e  ho kustu US$700.00 to’o US$1,000.00  tuir kualidade kuartu ne’ebé  mak iha Otel refere oferese.

Hafoin ekipa konjunta halo buska  kontinua kedas lori sidadaun estranjeiru na’in-16 ba iha edifísiu DSIK iha Komandu Jerál PNTL hodi kontinua prosesu identifikasaun.

Jornalista: Juvinal Cabral dos Santos