PR Hamutuk ho Laureadu Nobel Sira Sei Vizita Atauro, Ermera ho Jakarta

Prezidente Repúblika, José Ramos-Horta.

Díli, 25 Agostu 2026 (RAFA)- Prezidente Repúblika, José Ramos-Horta, hamutuk ho laureadu Nobel sira no sientista internasionál sira sei vizita Atauro, Railaku-Ermera no Jakarta-Indonézia.

Xefe  Estadu dehan, siuentista oi-oin iha área medisina, austronomia, informasaun teknolojia, ekonomista lubuk ida ne’ebé mai husi rai barbarak loron rua nia laran, Segunda-Tersa 24-25 Agostu-ne’e, sira sei vizita fatin sira Timor-Leste no Indonézia molok fila hikas ba sira nia nasaun orijin.

“Aban, (Kuarta 26 Agostu) sira sei balun ba Atauro, balun ba vizita plantasaun kafé iha Railaku-Ermera. Iha Kinta,  27 Agostu,  tuku 07:00 dader Otl, ha’u rasik akompaña sira ba Jakartak Parke Nasionál, maibé la to’o loron ida. Iha loron tuir mai, ha’u rasik lori sira, primeiru almosu ho Eis Prezidente Megawati, lokraik hasoru malu Prezidente Prabowo, parte Indonézia mak husu, se bele lori sira ba,” Prezidente Repúblika, José Ramos-Horta informa liu husi entrevista hafoin ensera Simeira Siénsia ba Dezenvolvimentu 2026 iha Centro Convensaun Díli (CCD), Tersa-ne’e.

Xefe Estadu hatete simeira boot ida, primeiravez la’ós de’it iha Timor-Leste, maibé primeiravez iha sudeste aziatiku, prémiu Nobel Sientista oi-oin mai iha grupu boot. Tanba, sira hotu-hotu kontente ho realidade saida mak haré iha Timor-Leste, kontente ho setór edukasaun, joventude, iha dezafiu barak mais sira optimista, sira hakarak kontinua apoia.

Ba oin sira sei mobiliza sira nia universidade bara-barak, sira halo tiha ona asina ida ho Institutu Nobel iha Alemaña, akordu Alemaña ho Suwesia mak simu komité sentrál Nobel siénsia.

Hanesan mós Norwegia komité ba paz, akordu ida ne’e Xefe Estadu halo ho komité siénsia sira, maibé tinan-tinan bele haruka Timor-oan ida ka rua. Tinan sira nia laran haruka tiha ona, la’ós primeiravez, tinan hira nia laran ida, rua ba tiha ona. Tanba ne’e sira konvida estudante, joven atus haat (400) tinan-tinan ba iha ne’eba, semana rua hamutuk ho joven sira.

Purtantu dinámika ida ne’e, movimentasaun atu halo saida, la’ós atu lakon tempu, la’e, ne’e siénsia duni ne’ebé top iha mundu atu aprejenta Timor ba mundu no loke oportunidade ba se, la’ós loke oportunidade ba ha’u, ba maun Xanana,  doutor Marí Alkatiri, la’e, ne’e loke ba jerasaun foun.

“Ita rai ida ne’ebé kiik, foun la’ós tinan 50 indepedensia, maibé bele dada ema sientista boot liu iha mundu mai iha ne’e, sira mai husi dook tebe-tebes. Sira mai ne’e hatudu katak, governante Timor-Leste, Primeriu Ministru, Xanana, ha’u rasik ho Ministru sira bele organiza eventu ida estruturadu di’ak, la’ós arbiru, ho metodolojia rigór, akademiku, liu-liu ba joven sira bele partisipa, estudante universitáriu sira iha área siénsia nian,” Xefe Estadu dehan.

Prezidente Repúblika subliña akadémiku sira agora balun tinan 50 ona mais sei joven, maibé liu-liu ba estudante universitáriu sira. Agora Nobel da Pas lubuk ida, tanba tinan kotuk mai, tinan rua liu ba mós mai, agora mak primeiravez grupu boot ida, husi Kanada, Rúsia, Amérika, Singapura, Eropa rai bara-barak sira mai iha ne’e.

Jornalista: Cristina Ximenes