Utiliza Veíkulu Estadu iha Loron Feriadu, Funsionariu Públiku Na’in-Neen Detein iha Sela CAC

Funsionáriu Públiku sira detein iha sela CAC tanba suspieta ba krime pekulatu ba uzu, Tersa 25 Agostu 2026.

Díli, 25 Agostu 2026 (RAFA)– Ekipa Konjunta Monitorizasaun no Fiskalizasaun, kompostu hosi Komisaun  Anti-Korrupsaun (CAC), Diresaun Nasionál Transporte no Terrestre (DNTT),  Komisaun Funsaun Públiku (CFP), Inspesaun Jerál Estadu  (IGE) ho Patrimonia Estadu detein Funsionariu Públiku na’in-neen (6) ne’ebé suspeita ba krime pekulatu ba uzu hodi utiliza veíkulu Estadu hodi hala’o atividade privadu iha loron feriadu.

Tuir lei pekulatu  ba uzu iha artigu 83, lei númeru 7/2020, kona-bá mekanizmu prevensaun bele hetan Pena Prizaun tinan-rua, no mós aplika medida seluk tan.

Adjuntu Komisáriu Investigasaun CAC, Álvaro Maria Freitas, Tersa-ne’e informa asaun auto stop ne’ebé hala’o iha Díli durante loron-rua; Sábadu-Domingu, 22-23 Agostu-ne’e, ho objetivu atu fó mensajen forte ba funsionáriu Estadu sira atu uza sasán Estadu ho responsabilidade.

“Asaun ne’e halo iha loraik to’o kalan durante 22-23 Agostu-ne’e,  konsege detein karreta  neen, ho motór 16, no mós detein suspeitu ka arguidu sira na’in-neen (6) ne’ebé maka utiliza  sasán Estadu iha loron ne’ebé la’ós servisu nian. Arguidu  sira ne’e hotu iha hela detensaun CAC nian” Adjuntu Komisáriu Investigasaun CAC Álvaro Maria Freitas informa.

Nia hatutan, karreta Estadu sira ne’ebé fornese ba servisu públiku tenke uza de’it ba atividade relasiona ho servisu Estadu nian, no labele uza durante loron feriadu ka ba atividade privadu. Tanba utilizasaun sasán Estadu ba interese privadu bele tama iha krime pekulatu ba uzu, tuir Kódigu Penál Timor-Leste.

Iha fatin hanesan, Adjuntu Komisáriu ba Asuntu Prevensaun no Sensibilizasaun CAC, Rosario Salsinha Araújo, hateten CAC halo ona atividade oin-oin no kobre Funsionariu Públiku iha territóriu laran tomak, halo sensibilizasaun bá utilizasaun sasán estadu nian.

“Ko’alia beibeik  bá prevensaun, liga ho pekulatu ba uzu, funsionariu sira tenke toma responsabilidade, bá sasán sira ne’e, tanba potensia ita fó prezuizu bá estudu,” nia  afirma.

Komisáriu Adjuntu CAC  ba Asuntu Serbisu Apoiu no Kooperasaun,Miguel Acácio Faria, informa mós katak asaun auto stop ne’e la’ós servisu foun,  maibé antes ne’e iha iha kooperasaun no tuir  nota intendimentu  ne’ebé antes iha ona.

“Servisu ne’e la’o nafatin tanba antes ne’e unidade koordenasaun  halo ona kooperasaun hotu-hotu atu  servisu no hamutuk hodi prevene no kombate korrupsaun,” nia hateten.

Diretora-Jerál Jestaun Patrimóniu Estadu,  Timotia Marques hatete,   Patrimonia Estudu  maka diresaun ida atu fó kompetensia hodi haré bá jestaun bá patrimoniu Estadu nian hotu, tuir dekreitu lei númeru 80/2022, kona-bá jere veíkulu Estadu ninian no regulamentu veíkulu Estadu.

Nia fundamenta, liña ministériu sira atu jere  sira nia frota tuir númeru limitadu  ne’ebé iha,  katak veíkulu Estadu ne’e, tenke uza bá fins profisionál,  se halo servisu Estadu fora husi oras servisu, tenke  hetan karta autorizaun husi Dirijente.

Nia subliña, bazeia bá dekreitu lei númeru 20/2022,  maka forma Monitorizasaun  no fiskalizasaun Konjunta,  ne’ebé kompostu husi CAC, Polísia Tranzitu,  Inspesaun Jerál Estadu, DNTT, no CFP,  no Patrimonia Estadu.

Jornalista: Marcelino Tomae