Estudante sira Apresia no Orgullu Partisipa Simeira Siénsia Ba Dezenvolvimentu 2026

Estudante sira orgullu partisipa iha Simeira Siénsia ba Dezenvolvimentu 2026 durante loron rua; Segunda-Tersa, 24-25 Agostu 2026 iha CCD.

Díli, 25 Agostu 2026 (RAFA)- Estudante sira husi Universidade Nasionál Timor Lorosa’e (UNTL) no Eskola Báziku Centrál (EBC) Akadiru-Hun, apresia no orgullu partisipa iha sesaun atividade Simeira Siénsia ba Dezenvolvimentu 2026 hodi aprende no partilla sira nia koñesimentu iha siensia ne’ebé sai hanesan bukae ba Timor-Leste nia dezenvolvimentu iha futuru.

Estudante UNTL, Ivan Junior Pereira ba RAFA iha Sentru Konvensaun Díli (CCD), Tersa-ne’e, hateten,  nia gosta tebes ho Simeira Siénsia ba Dezenvolvimentu, tanba hanesan esperiénsia foun ida nu’udar estudante no ida-ne´e hanesan motivasaun ida atu aprende no halo inovasaun ba siensia ne´ebé iha hodi transformasaun ba sosiedade.

“Semináriu horsehik no ohin (24-25 Agostu 2026) ha’u gosta tanba ida ne’e hanesan esperiénsia foun ida mai ha’u nu’udar estudante. Ne’e hanesan oportunidade ida mós atu koñese oinsá mundu nia lala’ok, no ko’alia mós kona-ba teknolójia ne’e papél importante ida mós nu’udar estudante Timor-Leste tenke kompriende buat ida ne’e. Ha’u sente ida ne’e importante mai ha’u atu kompriende buat sira ne’e,” hatete Ivan Junior Pereira.

Nia hatutan, iha aprezentasaun panelista sira fahe sira nia esperiénsia no matenek ne’ebé di’ak tebe-tebes, no haree sira nia esperiénsia bele fó duni hanoin ida mai estudante oinsá bele dezenvolve Timor ne’e ba oin, liu-liu haree prespetiva sira nian kona-ba nasaun kiik hanesan Timor-Leste. Nune’e, sente ida ne’e importante ida nu’udar estudante atu kompriende di’ak liu tan, oinsá evaluasaun teknolójia iha mundu ne’e ba oin ne’e oinsá.

“Semináriu Simeira Siénsia ba Dezenvolvimentu komesa horsehik no ohin nian ne’e ha’u akapta security husi teknolójia nian oinsá ita tenke evalui didi’ak, nune’e Timor-Leste agora daudaun tama ona ASEAN. Ita hatene katak, seguransa ne’e mós parte importante ida nune’e ita tenke evalui ka ita tenke dezenvolve, ha’u sente ida ne’e hanesan meius ida mai ita,” nia esplika.

Estudante ne´e mós agradese ba Prezidente Repúblika, José Ramos-Horta ho Governu Timor-Leste bele inisia Simeira Siénsia ba Dezenvolvimentu ida ne’e, nune’e iha hanoin oinsá futuru mai tekonolójia ninia evaluasaun, no oinsá ema halo security teknolójia ne’e oinsá. Hanesan, iha Artifisial Intelejensia oinsá bele ajuda estudante sira iha parte edukasaun, no oinsá ajuda funsionáriu sira iha servisu loro-loron.

Nia enkoraja ba maluk estudante sira labele lakon oportunidade, Timor-Leste dalan atu ba dezenvolvimentu no joven mak futuru ba nasaun, tenke tuir atividade sira hanesan ne’e hodi nune’e hasa’e kapasidade nune’e bele dezenvolve Timor katak presiza joven hanesan atu halo luhan  hanoin ba oin liu tan.

Iha fatin hanesan, Estudante Angelica da Costa Siquiera husi EBC Bidau Akadiru Hun, apresia tebes tanba nia bele aprende kona-ba tekonolójia.

“Ba ami estudante bainhira ami la hatene buat ruma ami bele buka iha tekonolójia no bele hatene informasaun barak husi teknoloji, tanba ida ne’e mak semináriu ida ne’e importante tebes loos mai ami no ami presiza hatene barak kona-ba teknolójia. Bainhira aprende kona-ba tekonolójia aban bainrua sei hatene barak sentista barak, no bele komunika husi nasaun sira seluk no mós bele hatene bainhira uza tekonolójia fasil atu aprende matéria oi-oin de’it,” hatete Estudante Angelica da Costa Siquiera.

Estudante Graselarista da Costa husi EBC Bidau Akadiru Hun, nia gosta tebes Simeira Siénsia ba Dezenvolvimentu ida ne’e tanba bele hanorin ema adapta teknolójia.

“Ha’u gosta tebe-tebes, no ha’u apresia tebes panelista sira esplika ne’e atu fó hanorin ita, ita mós bele adapta. Panelista balun esplika vantazen no des-vantazen buat ne’ebé ema la hatene, nune’e sira esplika atu hatene nafatin, tanba teknolójia ne’e fó vantazen no des-vantazen ba ema,” Graselarista da Costa hateten.

Nia hatutan, hanesan orador no sientista sira dehan tekonolójia ne’e di’ak, tamba ne´e bele konsulta teknolójia mas tenke buka rasik matenek liu husi estuda no halo perskiza sira no teknolojia atu tulun no kompleta.

RAFA nu’udar parseiru ofisiál mídia husi simeira ne’e no transmite diretamente sesaun hotu-hotu. Ho tradusaun ba Tetun, no mós halo kobertura notisia kona-ba eventu ne’e.

Jornalista: Cristina Ximenes