Funsionáriu SEKOOP Estabelese Kooperativa Rasik

Asembleia jerál kooperativa funsionáriu SEKOOP, Sesta 21 Agostu 2026.

Díli, 21 Agostu 2026 (RAFA) -Funsionáriu sira iha Sekretaria Estadu Kooperativa (SEKOOP),  Sesta ne’e, ofisializa sira-nia kooperativa rasik liuhosi asembelia jerál hodi hili estrutura ba mandate tinan tolu to’o tinan lima tuir Dispozisaun iha Dekretu-Lei Kooperativa.

Kooperativa funsionáriu SEKOOP nian ne’e hahú ho montante US$35.00  ne’ebé define poupansa inisiál US$15.00 USD, kontribuisaun obrigatóriu US$5.00 no US$10.00  ba administrasaun.

“Desizaun kona-bá montante inisial ne’e depende ba Assembleia. Bele hahú husi US$35.00, US$50.00 ka US$100.00, tuir desizaun Assembleia nian,” Sekretáriu Estadu Kooperativa (SEKOOP), Arsenio Pereira esplika.

Nia hatutan katak atividade grupu kooperativa funsionáriu SEKOOP nian  ne’e bazeia ba Dekretu-Lei Kooperativa Primária, ne’ebé kobre liuhosi ramu kooperativa 10, inklui komérsiu, uniaun de kréditu, agrikultura no ramu sira seluk, tuir interese no kapasidade membru sira.

Fatin hanesan Prezidente eleitu Grupu Kooperativa Funsionáru SEKOOP, Juvelino Gomes Bianco de Araújo, hateten kooperativa ne’e hakarak sai ezemplu ba instituisaun sira seluk no konkretiza lema SEKOOP nian katak, “kuda saida mak ita han, no han saida mak ita kuda”.

Juvelino subliña durante nia mandatu sei fó prioridade ba atividade multisektorial ne’ebé bele envolve membru sira iha ramu kooperativa oioin.

“Hau hakarak ne’e sai multisektorial, atu ita bele akumula atividade hotu ne’ebé membru sira iha kapasidade atu ezekuta iha ramu saida deit,” nia hateten.

Nia mós prontu atu rona no konsidera ideia husi membru sira atu bele implementa durante mandatu, ne’ebé bele to’o tinan lima, tuir dispozisaun lei, planu no asaun kooperativa.

Enkuantu funsionariu sira ne’ebe prontu atu investe dahuluk ba iha grupu kooperativa ne’e ho total ema na’in-190.

Grupu Kooperativa funsionáriu SEKOOP ne’e harii husi inisiativa funsionáriu tomak, ho objetivu atu sai ezemplu ba instituisaun seluk, no mós ajuda membru sira bainhira hasoru nesesidade urjente.

Jornalista : Remigia Locatelli