Veteranu no FALINTIL Sira Presiza Tratametu Ba Sira-Nia Saúde

Veteranu no FALINTIL, João da Costa Mauringo.

Quelicai, 20 Agostu 2026 (RAFA)- Eis-FALINTIL no veteranu João da Costa “Mauringo” lamenta ho promesa tinan barak nia laran ne’ebé atu fasilita tratamentu saúde ba veteranu sira iha Foho Mateibian, Postu Administrativu Quelicai, Munisípiu Baucau.

Veteranu “Mauringo” ba jornalista sira iha ámbitu serimonia aniversáriu FALINTIL ba dala-51 (20 Agostu 1975-2026), iha Suku Abo, Postu-Administrativu Quelicai, Kinta-ne’e,  hateten, loron 20 Agostu-ne’e  importante ba Timoroan hotu tanba loron ne’e atu valoriza istória no respeita sakrifísiu memoria luta libertasaun nasionál nian.

“Ami mak hanesan ne’e de’it. Tratamentu ba ami-nia saúde ne’ebé tinan barak mai halo promesa to’o agora laiha realidade, balun mai ko’alia de’it trata mais ami la haré buat ida. Nune’e mak ami kaer ami nia servisu rasik hodi moris, agora simu ona ami nia osan oituan-oituan ne’e mak ami presiza uza hodi ba konsulta,” Veteranu João da Costa “Mauringo” hateten.

Veteranu ne’e haktuir katak antes ne’e ekipa balun vizita no promete atu halo tratamentu konsulta ba sira-nia saúde. Nia sofre moras tanba hetan tiru husi inimigu bainhira sira ba halo embuskada iha ai-laran.

“Tanba ha’u nia ruin sai hotu. Mais uluk sira mai trata no haré hotu ha’u, dehan konsulta ami, maibé to’o agora ami hein laiha de’it. Mais agora funu hotu ona ami mós hela de’it ami nia knua nafatin ho família sira, trata ka la trata ami nia saúde ami lahatene,” João da Costa “Mauringo” hateten.

Nia hetan tiru bainhira nia kelen  ne’e ruin sai, ho kondisaun moras ida-ne’e sai bareira tebes atu tuir atividade importante sira.

Maski nune’e, nia dehan tanba funu hotu ona nia prefere deskansa ho nia família hodi sustenta oan sira. Nia mós ba ona halo konsulta iha Ospitál Riamare-Baucau, maibé simu de’it ai-moruk no moras nafatin.

Aleinde saúde, veteranu “Mauringo” mós lamenta nia grau ba funu rezisténsia nian hetan de’it 8/14 ne’ebé seidauk tuir nia luta.

“Balun mak hetan ona balun seidauk hetan, nune’e nia ba ona iha edifisiu veteranu nian, ha’u ba hasoru sira boot ne’e duni, maibé sira dehan hein lai tanba ida-ne’e la’ós haluha ne’e mak ita sei haree ida-ne’e ikus, tanba balun seidauk hakerek nune’e maun sira nia lalika preukupa,” nia afirma.

Veteranu ne’e husu ba Ministériu Asuntu Kombatente Libertasaun Nasionál (MAKLN) atu haré didi’ak ba veteranu sira nia preokupasaun, liu-liu kona-ba tratamentu ba sira-nia saúde no dignidade luta nian.

Jornalista: Juvinal Cabral dos Santos / João Carlos