Maubuti Propoin Ba Estadu Tau Prioridade Ba Dezenvolvimentu iha Matebian Hanesan Eransa Istóriku

Veteranu Lourenço de Carvalho “Maubuti” .

Díli, 20 Agostu 2026 (RAFA)- Eis-FALINTIL no veteranu Lourenço de Carvalho “Maubuti” husu Governu atu proteje Foho Matebian nu’udar fatin istóriku no eransa ba jerasaun foun.

“Maubuti” afirma aniversáriu FALINTIL ba dala-51 mak loron importante tebes ba jerasaun foun sira atu kontinua banati tuir istória.

“Komforme planu ita nia komandante no Governu halo oinsá mak kria mekanizmu ida hodi Matebian hanesan area historiku bá jerasaun foun sira nian, kaer metin nafatin tanba ami katuas hotu ona, depois de jerasaun foun hanesan dezenvolve agora halo dadaun ne’e,” Veteranu Lourenço de Carvalho “Maubuti”  hateten ba jornalista sira iha Suku Abo, Postu-Administrativu Quelicai, Munisípiu Baucau, Kinta-ne’e.

Veteranu ne’e esplika istória kona-ba Foho Matebian tenke habelar ba jerasaun foun no povu atu banati tuir nafatin FALINTIL nia espíritu luta libertasaun ba nasaun ida-ne’e.

“Ami katuas hotu ona nu’udar veteranu no FALINTIL, dalaruma governu mak hatene halo oinsá para dezenvolvimentu planu ba Herois ida nia fatin ka turizmu, kualker planu entre orientasaun ba governu ho FALINTIL elaborasaun ideia halo oinsá istória aban ba’in-rua labele haluha para jerasaun foun ninian,” nia tenik.

iha Aniversariu FALINTIL bá dala-51 (20 Agostu 1975-2026) ne’ebé  komemora iha Suku Abo, Postu-Administrativu Quelicai, Munisípiu Baucau ne’e sai momentu ba veteranu sira atu hanoin fali sakrifísiu no husu atensaun Estadu ba sira nia moris no ba preservasaun fatin luta nian.

 Jornalista: Juvinal Cabral dos Santos/ João Carlos