Estudante Estajiáriu Husi UPN “Veteran” Java Leste Introdus Literásia Dijitál Ba Estudante Sira Iha Ensinu Báziku Sentrál Soba

Estudante estajiáriu Projetu Humanitáriu Internasionál husi Universitas Pembangunan Nasional "Veteran" (UPN) Java Leste introdus literasia dijitál ba estudante Ensinu Báziku Sentrál Soba, Laga, Baucau, Kinta 20 Agostu 2026.

Laga, 20 Agostu 2026 (RAFA) – Estudante estajiáriu Projetu Humanitáriu Internasionál husi Universitas Pembangunan Nasional “Veteran” (UPN) Java Leste introdus  literasia dijitál ba estudante Ensinu Báziku Sentrál Soba, Postu Administrativu Laga, Munisípiu Baucau, Kinta-ne’e.

Edukasaun literasia dijitál ne’e fó ba estudante nivel pre- sekundaria nu’udar parte ida husi programa estajiu projetu humanitáriu internasionál.

Iha atividade ne’e, estudante universitáriu sira fó introdusaun kona-ba seguransa dijitál, inklui ezemplu kona-bá informasaun pesoál ne’ebé la apropriadu atu fahe ho ema seluk iha espasu dijitál.

Estudante sira mós aprende kona-bá importánsia hodi kria no mantein password ho seguransa, atu prevene ema seluk asesu fasil ba konta pesoál sira.

Materiál husi formasaun ida-ne’e sai nu’udar introdusaun báziku kona-bá seguransa dijitál, ne’ebé estudante sira bele aplika bainhira uza teknolojia iha sira-nia atividade loroloron.

Estudante estajiáriu sira mós introdús téknika simples ba edisaun uza aplikasaun Canva hodi aprende kona-bá funsaun báziku iha aplikasaun ne’e, oinsá atu uza Canva hodi kria dezeñu simples.

Atividade ne’e sai mós parte husi introdusaun teknolojia ba  kriativu, ho objetivu atu enkoraja estudante sira uza teknolojia ho maneira pozitivu no produtivu.

Emmanuella Florensia Sipayung, estudante estajiáriu husi Programa Estudu Ilmu Komunikasi,  haktuir katak  edukasaun ne’e importante tanba estudante sira presiza komprende risku sira ne’ebé bele mosu bainhira uza média dijitál.

“Edukasaun hanesan ne’e presiza introdus ba estudante sira, tanba sira presiza komprende risku bainhira uza média dijitál,” Emmanuella hateten ba jornalista sira.

Nia hatutan materia kona-bá seguransa dijitál no Canva aprezenta ho objetivu atu estudante sira bele komprende oinsá atu uza teknolojia ho seguransa, no iha tempu hanesan uza teknolojia ba atividade ne’ebé produtivu no kriativu.

Diretór Eskola Ensinu Báziku Sentrál Soba, Alberto Freitas de Castro, relata katak kompreensaun estudante sira kona-bá teknolojia dijitál sei limitadu no estudante balu seidauk abitua uza ekipamentu hanesan komputadór no laptop.

Nia konsidera estudante sira presiza hetan introdusaun no treinamentu ho etapa  atu fasilita sira komprende no uza ekipamentu teknolojia ho di’ak.

Nia kompara estudante sira iha eskola seluk, maka  sira-nia sei dook iha kotuk, tanba seidauk hatene kona-ba laptop ka komputadór. Karik sira hatene ona ekipamentu ne’e, maibé oinsá atu uza sei difísil tanba seidauk hetan formasaun.

Jornalista: Marito da Costa