Timor-Leste Tenke Preparadu Enfrenta Dezastre Naturál Sira

iha semana ne'e nia laran Díli enfrenta anin ho intensidade boot-naton no lori rai-rahun maka'ás.

Díli, 19 Agostu 2026 R(AFA)- Prezidente Repúblika (PR), José Ramos-Horta hateten ho akontesimentu rai-nakdoko no dezastra naturál ne’ebé akontese iha Indonézia, liu-liu iha Illa Flores, Nusa Tenggara Timur (NTT),  sai lisaun boot ba Timor-Leste atu  tenke preparadu ho rekursu no ekipamentu hodi enfrenta dezastre naturál sira.

Prezidente Repúblika (PR), José Ramos-Horta hatete rai-nakadoko iha NTT ne’e haruka nia karta ba Prezidente Repúblika Indonézia  Prabowo Sobianto hatoo solidaroiedade no kondolénsia. Tanba dezastre naturál ne’e akontese iha rai bara-barak, Kolómbia mós no buat hotu-hotu impaktu ba rai kiik, rai boot Xina hotu-hotu sempre enfrenta tanba ne´e importante tenke preparadu.

“Ne’e mós bele akontese ho ita, akontese inundasaun 2021-2022 ne’e ema lubuk ida terus, sasan lubuk ida estragu. Tanba mudansa klimátika, loron manas maka’ás bele rezulta ema lubuk ida mate, inklu  tanba mós insendu. Timor-Leste tenke preparadu ba dezastre naturál, ha’u haré ladun, sira liga ho dezastre naturál ne’e servisu di’ak tebe-tebes mais meius ladun, koordendasaun tenke di’ak liu,”  Prezidente Repúblika, José Ramos-Horta hateten.

Xefe Estadu hatutan, rekursu umanus barak liu, infraestrutura ekipamentu barak liu bele, depois tenke iha prevensaun teknolójia ne’e importante bele hatene loron ka semana ruma bele hatene ona dezastre naturál akontese.

Antes ne´e, Prezidente Repúblika José Ramos-Horta, hato’o sentidu kondolénsia kle’an ba Governu no povu Indonézia hafoin rai-nakdoko katastrófiku ne’ebé akontese iha illa Flores, hodi rezulta ema barak mate, kanek, no destruisaun ne’ebé boot.

Iha karta formál ida ne’ebé diriji ba Prezidente Repúblika Indonézia, Prabowo Subianto iha loron 18 fulan-Agostu tinan 2026, Xefe Estadu José Ramos-Horta espresa tristeza kle’an kona-ba dezastre, ne’ebé desloka ema rihun ba rihun no estraga maka’as uma, fasilidade saúde, eskola no infraestrutura krítiku sira.

Jornalista: Cristina Ximenes