Roque Rodrigues Husu Mantén Espíritu FALINTIL

Roque Rodrigues

Díli, 19 Agostu 2026 (RAFA)-Veteranu Frente Diplomatiku (externa), Roque Rodrigues, hateten komemorasaun loron FALINTIL ba dala-51 (20 Agostu 1975-2026) Timoroan hotu tenke mantén sentidu no espíritu FALINTIL nian iha baze ba luta independénsia  tanba laiha FALINTIL, laiha independénsia.

Veternanu no polítiku Roque Rodrigues hatoo nia mensajen ne´e atu hanoin hikas komemorasaun 20  Agostu ne´ebé estadu RDTL tau hanesan loron komemorativa hodi fó onra ba FALINTIL sira hotu ne´ebé terus no sakrifika sira nia vida ba libertasaun patria no defende soberani povu  Timor-Leste nian.

Roque Rodrigues ba jornalista sira iha Edifísiu Ministériu Negosiu Estranjeiru no Kooperasaun (MNEK), Kuarta-ne´e, esplika katak FALINTIL mak liman armadu husi povu Maubere ne’ebé sai abut ba ukun rasik an no ho sira nia determinasaun iha luta mak ikus mai hamutuk ho povu maubere liberta rai ne´e husi invazor sira.

“FALINTIL mak liman armadu husi povu Maubere. Se laiha FALINTIL, laiha independénsia. Ita-nia abut forte iha FALINTIL. FALINTIL hatudu ita-nia povu nia laran no aspirasaun. Ita-nia luta mak luta naruk, no komponente sira seluk mós hamutuk ho ita,”  Roque Rodriges hateten.

Nia haktuir kona-bá Trindade Sagrada ne´ebé kompostu husi Frente Armanda (FALINTIL), Frente Klandestina no Frente Diplomatik  (extern) mak  sai xave ba vitória iha luta rezisténsia.

Nia esplika frente ka komponente tolu ne’e hamutuk sai hanesan trindade ida. Sira hotu hamutuk ho nia povu, no hetan forsa husi povu. Tanba ne’e konsege hetan buat ne’ebé povu  hakarak atu restaura soberania no independénsia Timor-Leste.

Nia hatutan, mundu rekoñese ona direitu sagradu povu Timor-Leste atu sai livre no independente. Ida-ne’e mak méritu husi FALINTIL. Maibé, FALINTIL mesak la bele to’o mai iha ne’e.

Roque subliña katak se laiha FALINTIL, sei la iha Timor-Leste livre, soberanu no independente. Nune’e nia husu ba jerasaun militár no jerasaun kulturál atu kontinua dezenvolve no defende direitu sagradu ne’e.

“Primeiru liu-liu mak aprende espíritu atu serbí, espíritu sakrifísiu. FALINTIL la ha buat ida atu simu; sira entrega buat di’ak liuhosi sira-nia an rasik. Ida-ne’e mak lisaun ne’ebé ita hotu, liu-liu ita nia forsa foun, FALINTIL–Forsa Defesa Timor-Leste (F-FDTL),” Roque Rodrigues hateten.

Nia husu ba membru F-FDTL atu aprende no hatene serbí nasaun ne’e hanesan FALINTIL iha tempu luta. Iha ran, no sakrifísiu, sofrimentu no solidariedade. Agora presiza aprende atu serbí. Serbí liután no di’ak liután, atu hametin ita-nia soberania.

“Ida-ne’e mak buat ne’ebé ita presiza halo. Tanba ne’e, viva tinan 51 FALINTIL. Viva FALINTIL,” Roque Rodrigues konklui.

Jornalista: Juvinal Cabral dos Santos