Aero Dili Seidauk Bele Halo Voo Díli–Kupaun

Armada rua Aero Díli, Airbus A320 ho Airbus A319.

Díli, 18 Agostu 2026 (RAFA) —Aero Dili momentu ida-ne’e seidauk bele halo operasaun ka voo Díli-Kupaun no Kupaun-Darwin, Austrália tanba Aero Dili ho nia armada rua de’it, Airbus A320 ho Airbus A319  ne’ebé laiha ona sloot ka laiha ona tempu naton atu atende voo foun.

Diretór Ezekutivu Aero Dili, Lourenço de Oliveira, liuhosi konferénsia imprensa iha Díli, Tersa-ne’e, konfirma katak nia parte hetan konvite husi Governadór Nusa Tenggara Timur (NTT),  Emanuel Melkiades Laka Lena, hodi hasoru malu iha Kupaun iha Sábadu 15 Agostu-ne’e, hodi diskute kona-bá  intensaun no proposta husi Governadór nian atu posebilidade Aero Dili halo voo komersiál Díli-Kupaun.

“Atualmenta ita seidauk bele halo operasaun Díli-Kupaun ka Díli-Labuan Bajo-Darwin, Austrália, tanba ita foin iha aviaun rua; Airbus A320 ho Airbus A319 ne’ebé nia oras voo nian ka sloot nakonu ona. Karik iha tinan oin, ita iha aviaun foun, foin bele halo tan operasaun ba Kupaun, mas ne’e mós depende ba Air Agreement Service entre Governu Timor-Leste ho Indonézia,” na’in ba Aero Dili ne’e informa.

“Ha’u mós lakohi atu hamate vontade maun-alin sira ne’ebé hala’o negosiu iha transporte Terrestre Díli-Kupaun, tanba sira, liuliu señora sira, maka hala’o sira nia negósiu. Ita la bele hamate sedu. Ita tenke la’o hamutuk. Ne’e mak  ha’u nia konsiénsia,”  CEO Aero Dili haktuir.

Lourenço esplika proposta  husi Governadór NTT nian ne’e bele  posível atu hala’o, maibé Aero Dili seidauk iha kapasidade atu responde ba pedidu ne’e ho lalais tanba númeru armada Aero Dili nian limitadu ka foin iha aviaun rua de’it.

“Ha’u informa ona ba Governador katak ami iha aviaun oras ne’e la to’o atu aumenta tan rota. Se ami atu semo, ami tenke hein to’o tinan oin, bainhira ami aumenta aviaun ida. Se Governadór hakarak urjente, hau seidauk bele hatan,”  Lourenço de Oliveira hateten.

Nia mós sujere iha Indonézia kompania hanesan Lion Group no Garuda Indonesia iha kapasidade atu halo operasaun husi Kupaun mai Díli, no mós liga Kupaun  ho destinasaun internasionál sira seluk, inklui Darwin no Labuan Bajo. T

Tuir Lourenço de Oliveira, se iha tinan 2027 Aero Dili konsege aumenta númeru aviaun, posibilidade atu lansa voo Dííi–Kupaun sei aumenta. Tanba, operasaun voo internasionál iha rekizitu no preparasaun barak liu kompara ho voo doméstiku.

Aero Dili lansa voo internasionál komersiál dahuluk ba Denpasar/Bali (Indonézia) iha  loron 12 fulan-Maiu 2023, uza aviaun Airbus A320, ne’ebé lori mudansa boot ba aviasaun sivíl iha Timor-Leste.

Aero Dili (Aero Dili Service Transport) mak kompañia aérea nasionál dahuluk iha Timor-Leste, ho nia sede no hub prinsipál iha Aeroportu Internasionál Prezidente Nicolau Lobato, Comoro, Díli.

Kompañia Aero Dili funda  iha  loron 21 fulan-Juñu tinan 2018 husi emprezáriu timoroan Lourenço de Oliveira, hodi hahú operasaun ho aviaun ki’ik hodi apoia mós servisu doméstiku no seguransa.

Dau-daun ne’e, Aero Dili ho nia armada rua; Airbus A320 ho  AirbusA319 halo operasaun kada loron Díli-Denpasar/Bali, Díli ba Darwin-Austrália semana ida dala rua (Tersa ho Domingu), no Díli-Xina/Xiamen kada semana dala-rua, Díli-Singapura  ho Díli-Malázia.

 Jornalista:  Remigia Locatelli